Միջգերատեսչական հանձնաժողովի նիստ` ՊՆ-ում

Փետրվարի 27-ին  ՀՀ ՊՆ վարչական համալիրում տեղի ունեցավ մարտական գործողությունների մասնակիցների և երկրապահ կամավորականների կարգավիճակի հարցերով զբաղվող միջգերատեսչական հանձնաժողովի հերթական նիստը. տեղեկացնում է ՀՀ պաշտպանության նախարարության տեղեկատվության և հասարակայնության հետ կապերի վարչությունը։

Նիստին մասնակցում էին միջգերատեսչական հանձնաժողովի նախագահ, պաշտպանության նախարար Սեյրան Օհանյանը, հանձնաժողովի փոխնախագահ, Երկրապահ կամավորականների միության վարչության նախագահ Մանվել Գրիգորյանը, հանձնաժողովի կազմում ընդգրկված գերատեսչական կառույցների ներկայացուցիչներ: 

Հանդիպման ընթացքում արծարծվել են հայրենիքի պաշտպանության մարտերին մասնակցած անձանց մարտական գործողությունների մասնակցի և երկրապահ կամավորականի կարգավիճակի տրման ընթացակարգով սահմանված դրույթները, խնդրահարույց հարցերը և անհրաժեշտ փաստաթղթերի ցանկը, ճշգրտվել են հանձնաժողովին ներկայացված ցուցակները:

Ըստ այդմ՝ միջգերատեսչական հանձնաժողովը քննարկել և հաստատել է հայրենիքի մի շարք պաշտպաններին մարտական գործողությունների մասնակցի և երկրապահ կամավորականի կարգավիճակի շնորհման դիմումները: