Արվեստի հաշվին ուրիշին լավություն անելն ամենամեծ սխալն է. Ռուբեն Բաբայան

Վերջին շրջանում մշակութային մի շարք հաստատություններում տեղի են ունենում ոչ մշակութային իրադարձություններ` ոչ պատճառաբանված կրճատումներ, նոր նշանակումներ…

Այսօր լրագրողների հետ հանդիպման ժամանակ Հովհաննես Թումանյանի անվան պետական տիկնիկային թատրոնի տնօրեն, գեղարվեստական ղեկավար Ռուբեն Բաբայանը նշեց, որ, իր կարծիքով, յուրաքանչյուր որոշման հիմքում պետք է շատ հստակ գեղարվեստական տրամաբանություն լինի` հանուն ինչի է այդ որոշումը կայացվում: Եթե, ըստ նրա, որոշումը կայացվում է մարդկանց ամբիցիաները բավարարելու համար, մշտապես հարցականներ են մնալու, իսկ եթե փոփոխություններն արվում են թատրոնի կյանքը բարելավելու համար, ապա կարելի է հասկանալ:

«Յուրաքանչյուր փոփոխություն պետք է տրամաբանված լինի, սակայն, մյուս կողմից, արվեստագետներից ոչ ոք չպետք է նույն տեղում ցմահ լինի: Տաղանդը, ի դեպ, ցմահ տրված հատկություն չէ, այն ժամանակային սահմանափակում ունի, ուստի մարդուն պետք է «աշխատեցնել» այն ժամանակ, երբ նրա ծաղկուն շրջանն է: Յուրաքանչյուր արվեստագետ ունի բացասական և դրական կողմեր, և ինչ-որ մեկին ինչ-որ պաշտոնում նշանակելիս պետք է մտածել, թե արդյո՞ք ստեղծում ենք պայմաններ, որ նրա դրական կողմերը դրսևորվեն»,- ասաց Բաբայանը:

Ըստ նրա` բազմաթիվ նշանակումներ պարզապես չեն բացատրվում գործի պահանջներով, այլ` «այսինչն այս բանն ասաց», «այսինչի բարեկամին պետք է աշխատանքի դասավորել» սկզբունքով: Բաբայանի խոսքով` եթե աշխատանքից ազատման-ընդունման որոշում ես կայացնում, պետք է նաև հետևանքների մասին մտածել: «Ժամանակի հետ հաշվարկ չանելու մեծագույն վնաս եմ տեսնում»,- ասաց նա:

Բաբայանը նշեց նաև, որ թատերական ոլորտում գործող մեխանիզմները ժանգոտված են` հնուց եկած օրենքներով են առաջնորդվում: Նրա կարծիքով` թատրոններում նշանակումների-ազատման հարցը չպետք է լուծի մշակույթի նախարարությունը, այլ մարդիկ, ովքեր ղեկավարում են թատրոնը: Ըստ ռեժիոսորի` նախարարությանն ինչքան շատ գերատեսչության դեր վերապահվի, այնքան շատ նման իրավիճակների դեմ կառնենք. նախարարության դերը, Բաբայանի կարծիքով, չափազանցված է: «Նախարարությունը պետք է ոչ թե կազմակերպչական հարցերով զբաղվի, այլ ստատեգիական` օրենքների մշակում, փորձագետների խմբի ձևավորում և այլն»,- նշեց նա:

Տիկնիկային թատրոնի ղեկավարի կարծիքով` պետք է մի քիչ նուրբ մոտենալ թատրոնի ղեկավարի ընտրությանը, թե չէ` հիմա, պատասխանելով թեստում առկա հարցերին, ով ասես, որ չի կարող նշանակվել տնօրեն: «Բացի այդ` սա Հայաստանն է, որտեղ բարեկամներ ու ծանոթներ այնքան շատ ունենք... Արվեստի հաշվին ուրիշին լավություն անելն ամենամեծ սխալն է»,- ասաց նա:

Խոսելով թատերարվեստում առկա խնդիրների մասին` Բաբայանը նշեց, որ մեզ հաճախ խանգարում է այն հանգամանքը, որ նոստալգիկ ձևով նայում ենք անցյալ ու ասում, թե` այն ժամանակ ուրիշ էր, այն ժամանակվա ուսանողներն էլ ուրիշ էին: Ուսանողները, ըստ ռեժիսորի, նույնն են, նրանք չեն փոխվել, մենք` մեծերս ենք նույն տեղում դոփում:

«Եթե իմ առարկան չի հետաքրքրում ուսանողին, ես եմ մեղավոր, ուրեմն պետք է մտածեմ այն մասին, թե ինչ անել, որպեսզի նրա մոտ հետաքրքրություն առաջանա: Պետք է մի քիչ ճկուն լինել` ինչպես թատրոնում: Ժամանակակից թատրոնի դերասանը պետք է պահանջարկված լինի թատրոնի և կինոյի ցանկացած ժանրում, պահանջարկված լինելու մասին, ի դեպ, պետք չէ դատել սերիալներում նկարահանմամբ»,- ասաց Բաբայանը:

Նա անդրադարձավ նաև տիկնիկային թատրոնի կյանքին` նշելով, որ 2015-ը կայացած տարի էր թատրոնի համար` 6 նոր ներկայացում, մասնակցություն 9 փառատոնի: Սակայն, Բաբայանի հավաստմամբ, չնայած գրանցած հաջողություններին, թատրոնը ոչ մի օր հանգստանալու իրավունք չունի: Ավելին` հենց փորձես սահմանափակվել` միայն անցյալի հաջողությունները վայելելով, ժամանակը դուրս կնետի քեզ իր հոսքից:

«Այս տարի էլ թատրոնը նոր ներկայացումներ կունենա. Սամսոն Մովսիսյանը «Մատնաչափիկը» կբեմադրի, որն, ի դեպ, կլինի ստվերային ներկայացում: Բացի այդ` կբեմադրվի Աղայանի «Անահիտը»` մանրանկարչության սկզբունքով: Զարուհի Անտոնյանն էլ նոր ներկայացում կբեմադրի: Մենք անընդհատ փորձում ենք նոր շունչ հաղորդել ներկայացումներին, քանի որ արվեստը չի կարող դոփել նույն տեղում: Յուրաքանչյուր ժամանակ իր հետ իր արտահայտչամիջոցն է բերում, առավել ևս` թատերարվեստը: Թատերարվեստում դու գործ ունես այս պահի, այսօրվա հանդիսատեսի հետ, այլ ոչ թե անցյալի կամ ապագայի»,- ասաց Բաբայանը: