Գեղամյանը ճակատագրական սխալն ուղղեց

ԱԺ արտաքին հարաբերությունների մշտական հանձնաժողովի նիստում այսօր ուշագրավ դեպք տեղի ունեցավ: Հանձնաժողովի անդամ Արտաշես Գեղամյանը, ելույթում ներկայացնելով իր` «Ռուսաստանի և Հայաստանի ռազմավարական դաշինքը դարերի համար է» գիրքը, նվիրեց այն հանձնաժողովի նախագահ Արմեն Աշոտյանին` ափսոսանք հայտնելով, որ գրքի առաջին օրինակը չի նվիրել:

«Ցավոք, ԱՄՆ դեսպանի հետ հանդիպման ժամանակ, փոքր-ինչ սխալ եմ թույլ տվել և գիրքն առաջինը նրան եմ նվիրել, պետք է նվիրեի հանձնաժողովի նախագահ Արմեն Աշոտյանին, հիմա ուղղում եմ իմ սխալը»,- ասաց նա:

Աշոտյանն էլ կատակեց. «Հուսով եմ, որ սա չպետք է հայտարարագրեմ»:

Հանձնաժողովի մեկ այլ անդամ Շիրակ Թորոսյանն էլ ասաց, որ եթե տառերը ոսկի չեն, ապա հայտարարագրելու կարիք չի լինի:

Թորոսյանի այս արտահայտությունը դուր չեկավ Գեղամյանին, նա վիրավորվեց: «Բովանդակությունն է տեղով մեկ ոսկի, բայց` ոչինչ»,- ասաց Գեղամյանը: