Նախագահն ասում է, որ խնդիրը մեր մեջ է. Խոսրով Հարությունյան

Այսօր Yerkir.am-ի հետ զրույցում ԱԺ ՀՀԿ խմբակցության պատգամավոր Խոսրով Հարությունյանն անդրադարձավ ՀՀ նախագահ Սերժ Սարգսյանի երեկվա ելույթին:

Հիշեցնենք, որ երեկ նախագահական նստավայրում Սերժ Սարգսյանը քաղաքական վերնախավի ներկայությամբ հանդես եկավ ծրագրային ելույթով: Մասնավորապես` խոսեց հզոր հայրենիք ստեղծելու մասին, որի բնակիչներն իրենց երջանիկ պետք է զգան, չպետք է մտածեն երկիրը լքելու մասին, որտեղ պետք է լինի թափանցիկ իշխանություն, անկաշառ արդարադատական համակարգ:

Հարցին, թե արդյո՞ք ուշացած չէր այդ ելույթը, Խոսրով Հարությունյանը պատասխանեց, որ նախագահը խոսել է ոչ թե նոր մարտահրավերների, այլ հայտնի մարտահրավերներին նորովի մոտենալու անխուսափելի անհրաժեշտության մասին, դա պայմանավորված է նոր Սահմանադրության ընդունմամբ, որակապես նոր իրավաքաղաքական միջավայրի ձևավորմամբ: Ըստ նրա` նոր Սահմանադրությունը հնարավորություն է ընձեռում, որ ամեն մեկն իր պատասխանատվության չափով լծվի երկրի հզորացման գործին:

«Նախագահն ասում է՝ այլևս ժամանակն է հասկանանք, որ նոր տիպի կուսակցություններ պետք է ձևավորվեն, նոր քաղաքական համակարգ, որն ունակ կլինի արդյունավետ արձագանքել մարտահրավերներին: Նախագահն ասում է, որ, սկսած հասարակ քաղաքացուց մինչև նախագահ, պետք է հասկանալ, որ երկրի պատասխանատուն ենք: Նախագահն ասում է, որ պրոբլեմը մեր մեջ է, մեզանից յուրաքանչյուրի մեջ: Խոսքը ոչ թե այն մասին է, որ այդ մարտահրավերները հանկարծակի հայտնվեցին, այլ, որ դրանք վաղուց կան` կաշառակերությունը, չինովնիկների ամբարտավան կեցվածքը, անարդար մրցակցությունը տնտեսության ոլորտում և այլն: Նա չի մերժում այս ամենի առկայությունը, նա ասում է՝ եկեք հասկանանք, որ սահմանադրական փոփոխությունների արդյունքում նոր իրավաքաղաքական հնարավորություններ կստեղծվեն, որոնք պետք է առավել արդյունավետ օգտագործել»,- ասաց Խոսրով Հարությունյանը:

Հարցին` արդյո՞ք ելույթում արձանագրված մարտահրավերները չեն վկայում այն մասին, որ մինչ այժմ արդյունավետ չի եղել կառավարումը, նա պատասխանեց, որ կարող է բազում օրինակներ բերել, թե որքան բարեփոխումներ են կատարվել, որոնք ոլորտ առ ոլորտ նվազեցրել են կաշառակերության ռիսկերը, օրինակ՝ նոտարական ծառայության ոլորտում արդիական փոփոխություններ տեղի ունեցան, և այդ ոլորտն արդեն չի դիտվում որպես կոռումպացված ոլորտ: Փոփոխությունները տեղի ունեցան կադաստրի ոլորտում, հարկահավաքման գործընթացում էլեկտրոնային համակարգ ներդրվեց և այլն:

«Այսօր ցանկացած գործարար այլևս չի զգում հարկային տեսչի շնչառությունն իր ետևում: Այս ամենը արված է: Արդյո՞ք այս ամենը բավարար է: Նախագահն ասում է, որ` ոչ: Եվ նոր Սահմանադրության ընդունումից հետո ստեղծվել են այդ բարեփոխումները շարունակելու հնարավորություններ»,- ասաց պատգամավորը:

Սերժ Սարգսյանն իր ելույթում նաև կարևորել էր սեփական բարօրությունից վեր կանգնած հանրային ծառայող ունենալու գործոնը: Հարցին, թե հավատո՞ւմ է, որ Հայաստանում կարող են լինել այդպիսի հանրային ծառայողներ, Խոսրով Հարությունյանը պատասխանեց, թե պետք է միշտ ձգտել դրան:

«Արևմտյան երկրների փորձն ի՞նչ է հուշում: Ի՞նչ է, այնտեղ բոլոր չինովնիկները հանրային բարօրությունը ավելի բա՞րձր են դասում, քան սեփականը: Այնտեղ էլ կան նման դրսևորումներ: Եվ եթե մեր առջև նման նպատակներ ու ստանդարտներ չդնենք, ապա դրանց չենք հասնի»,- ասաց նա:

Հարցին, թե հավատո՞ւմ է ելույթի այն հատվածին, որտեղ նախագահը հույս է հայտնում, որ Հայաստանը կհզորանա ու կբռնի վերելքի ուղին, պատգամավորը նշեց, որ դրան, անկասկած, հավատում է:

«Մինչև 2008-ը դուք հավատո՞ւմ էիք, որ Հայաստանը կարող է ունենալ երկնիշ տնտեսական աճ, երբ արտագաղթը ոչ միայն նվազեց, այլև ներգաղթ արձանագրվեց: Դա եղել է, չէ՞: Եվ դա եղել է նույն Հանրապետական կուսակցության կառավարման տարիներին: Հետագայում, ցավոք, տնտեսական ճգնաժամը, աշխահաքաղաքական անկառավարելի զարգացումները իրենց ազդեցությունը թողեցին ինչպես աշխարհի բոլոր պետությունների, այնպես էլ Հայաստանի վրա: Չհավատալ երկրի ապագային` նշանակում է չհավատալ հայ ժողովրդի արարելու կարողությանը»,- ասաց Խոսրով Հարությունյանը:

Մեր դիտարկմանը, որ հայերը արարում են, բայց առավելապես Հայաստանից դուրս, նա պատասխանեց, թե կարող են պայմաններ ստեղծվել, որ հայերը նաև Հայաստանում մնան  ու արարեն: «Ինչո՞ւ մինչև 2008-ն այստեղ էին արարում, որովհետև կային, չէ՞, նպաստավոր պայմաններ: Նույն Հանրապետական կուսակցությունն էր կառավարում այդ ժամանակ: Ինչի՞ մասին է խոսքը: Մենք պարտավոր ենք հզորանալ»,- ասաց պատգամավորը: