Մեր ճակատին «հարիֆ» գրված չէ. Էրդողանը ՄԱԿ-ին ամոթանք է տվել

Թուրքիայի նախագահ Ռեջեփ Թայիփ Էրդողանն այժմ էլ ամոթանք է տվել ՄԱԿ-ին՝ կազմակերպությանը մեղադրելով սիրիացի փախստականների հարցում Թուրքիային չօգնելու մեջ:

Ըստ AA-ի՝ Թուրքիային սիրիացի փախստականների դիմաց սահմանները բացելու կոչ անող ՄԱԿ-ին դիմելով՝ նա ասել է. «Կներեք՝ մեր ճակատին «հարիֆ» գրված չէ: Է՜յ, ՄԱ\'Կ, դու ի՞նչ գործի ես ծառայում։ Քո պարտականությունը ո՞րն է։ Թուրքիան 10 միլիարդ դոլար է ծախսել երկրում գտնվող փախստականների համար, իսկ ՄԱԿ-ը Թուրքիային 455 միլիոն դոլար է հատկացրել։ Ամոթ է, ամոթ»:

Նշելով, որ «ՄԱԿ-ի՝ Թուրքիային հատկացրած 3 միլիարդ դոլարն ավելացվել է ոչ թե երկրի բյուջեին, այլ տրամադրվել է փախստականներին», Էրդողանն ասել է. «Մենք մինչ օրս 9 միլիարդ դոլար ծախսել ենք փախստականների համար` ոչ թե ՄԱԿ-ից ակնկալիքներ ունենալու, այլ մեր հյուրասիրությունից ելնելով: Մենք դրանից չենք վհատվել, ավելին՝ մենք շարունակելու ենք այդպես վարվել: Սա մեր առանձնահատկությունն է»: