Մեզ հաջողվեց բանաձևերից ամենավտանգավորը թույլ չտալ ընդունել. Գագիկ Մինասյան

ԱԺ ՀՀԿ խմբակցության պատգամավոր Գագիկ Մինասյանն այսօր լրագրողների հետ զրույցում անդրադարձավ ԵԽԽՎ նիստի օրակարգում ներառված երկու հակահայկական զեկույցներին, որոնցից բոսնիացի պատգամավոր Միլիցա Մարկովիչի` «Ադրբեջանի սահմանամերձ շրջանների բնակչությունը միտումնավոր զրկված է ջրից» զեկույցն ընդունվեց:

Մինասյանի խոսքով` ԵԽԽՎ-ում և միջազգային այլ հարթակներում բավական դժվար է հայամետ քաղաքականություն իրականացնել և հայկական շահերի օգտին գործել, հայկական դիրքորոշումն առաջ տանել, քանի որ «խավիարային դիվանագիտությունը» բավականին ուժեղ է:

«Եթե ԵԽԽՎ-ն գնար այդ նախագծերն ընդունելու ճանապարհով, մեծագույն պրոբլեմ կստեղծեր` խնդրի խաղաղ կարգավորման տեսանկյունից: Մեզ հաջողվեց բանաձերից ամենավտանգավորը թույլ չտալ ընդունել: Մյուսը ևս դեստրուկտիվ էր, այդուհանդերձ, ընդունվեց: Բրիտանացի պատգամավորի զեկույցը չընդունվեց, ինչը շատ կարևոր է: Սա ևս մեկ անգամ ապացուցում է, որ եթե միահամուռ ջանքերի լարումով աշխատում ենք, հասնում ենք ցանկալի արդյունքի: Մեր դեմ աշխատում էին ոչ միայն Ադրբեջանի ռեսուրսները, այլ նաև Թուրքիան: Պետք է նշեմ, որ Մինսկի խումբը գտնվեց իր բարձրության վրա և իր վճռական տեսակետը հայտնեց, առ այն, որ վերոնշյալ բանաձևերը չեն համընկնում Մինսկի խմբի կողմից տարվող քաղաքականությանը: Մենք պետք է շարունակենք ինտենսիվ աշխատել Մինսկի խմբի հետ»,- ասաց պատգամավորը:

Yerkir.am-ի հարցին, թե միահամուռ աշխատանքը, որը կանխեց հակահայկական վտանգավոր զեկույցի ընդունումը, ինչո՞ւ ավելի շուտ չէր տարվում, որպեսզի հնարավոր լիներ կանխել նմանատիպ զեկույցների մուտքը ԵԽԽՎ օրակարգ, Մինասյանը պատասխանեց, որ, անշուշտ, հայկական կողմը պետք է մշտապես զգոն լինի, սակայն չպետք է մոռանանք, որ մենք չունենք Ադրբեջանի ռեսուրսները: Նա նշեց նաև, որ ընդունված զեկույցը չունի պարտադիր իրավական ուժ, բայց այն արհամարհել էլ չի կարելի: