Ամեն կազյոլի հետ գործ մի՛ բռնի. հրաժեշտից առաջ այծը մկկացել է պատգամավորի ականջին

Yerkir.am-ի զրուցակիցն է ԱԺ ԲՀԿ խմբակցության պատգամավոր Արագած Ախոյանը: 

- 2015-ի ձեռքբերումը:

- Անձնական կյանքում 2015-ի ձեռքբերումը ընտանիքիս համալրումն էր. հարսիկ ունեցանք այս տարի: Իսկ գործնական կյանքում` ընդլայնվեց իմ գործունեության շառավիղը Արևմտյան Հայաստանում: 

 - Տարվա կորուստը:

- Կորուստ է սահմանին այսքան մեծ թվով զոհեր ունենալը:

 - Սպասելիքը 2016-ից:

 -Սպասում եմ, որ տնտեսական որոշակի բարեփոխումներ կլինեն, ժողովուրդը ավելի հեշտ կապրի մեր երկրում, իսկ բիզնեսի դաշտն ավելի կպարզեցվի ու հասանելի կլինի սովորական գործարար, ստեղծարար հայ մարդու համար: 

- 2015 թվականին ամենավառ տպավորությունը թողած կինը:

- Դժվարանում եմ պատասխանել, որովհետև կարող են մի քանիսը լինել, իսկ  ես, մեկի անունը տալով, գուցե բաց թողնեմ ամենակարևորին:

 - 2015-ի ամենահաջող քաղաքական գործիչը:

- Էլի դժվարանում եմ, նրանք մի քանիսն են, որոնցից ամեն մեկն ունի իր առավելությունները: Հաջող քաղաքական գործիչներ իսկապես ունենք, որոնցով կարելի է հպարտանալ, ովքեր միջազգային ատյաններում կարողանում են երկրի պատիվը բարձր պահել` իրենց գիտելիքներով: Նրանցից են Հերմինե Նաղդալյանը, Նաիրա Զոհրաբյանը, Արմեն Ռուստամյանը, Արտակ Զաքարյանը…

 -2015-ի ամենաանհաջող քաղաքական գործիչը:

- Կներեք, զերծ պահեք այս հարցին պատասխանելուց: Անհաջողներ կան, բայց նրանց անունները չեմ տա:

 -2015-ի հայաստանյան ամենատպավորիչ իրադարձությունը:

- Խոշոր իրադարձություն էին Հայոց ցեղասպանության 100 ամյա տարելիցի լուրջ միջոցառումները, ինչպես նաև Հայաստանում համահայկական խաղերի կազմակերպումը:

 -2015-ին աշխարհում ի՞նչ փոխվեց:

- Աշխարհում շատ բան փոփոխվեց, աշխարհը, մասնավորապես` Եվրոպան հասկացավ, որ մարդկությունը չի կարող առաջ գնալ` եվրոպական արժեքների հետևից միայն վազելով, որովհետև տեսանք` ինչ կատարվեց, երբ ահաբեկչությունը գլուխ բարձրացրեց աշխարհում և դարձավ չարիք ժողովուրդների համար: Միայն շուն ու կատվին կտակ թողնելով կամ այդ միասեռ ամուսնությունների քարոզով` մարդկությունը չի կարող առաջ գնալ:

-Այծի /2015-ը այծի տարի էր/ ամենացավոտ պոզահարումը` Ձեզ:

- Ուզում եմ զերծ մնալ պատասխանից, որովհետև կարող է այնպիսի մարդկանց դա հասցեագրվել, որոնք թիկունքից ինձ հարվածել են:

 -Իսկ երկրի՞ն:

- Մեր երկիրն արդեն սովորել է պոզահարումներին. երկու թշնամական պետության հարևանությամբ ենք ապրում, մեկի հետ հարաբերությունները սառեցված են, իսկ մյուսն ուղղակի գործող չարիք է Հայաստանի համար, ուստի պետք է միշտ զգոն լինել ու դիմակայել:

 -Ի՞նչ մկկաց այծը Ձեր ականջին հրաժեշտից առաջ:

- Հրաժեշտից առաջ այծը մկկաց, որ` ամեն մի կազյոլի հետ գործ մի’ բռնի:

 -Հիմա՝ մի քիչ հումոր, անցնենք կապիկներին. կապիկն ու կապիկությունը տարբե՞ր բաներ են:

- Իհարկե, կապիկը կենդանի է, իսկ կապիկությունը` այդ կենդանուն բնորոշ երևույթ, որը այսօր, ցավոք, ծաղկում է ապրում:

-Համաձա՞յն եք տեսությանը, որ մարդիկ առաջացել են կապիկներից:

/Ծիծաղում է/ Նայելով որոշ մարդկանց` իսկապես մտածում ես` ոնց որ թե կա նման տեսություն` Դարվինի տեսությունը, բայց, ի վերջո, ես էլ կարող եմ հարցնել` բա հիմա ինչո՞ւ կապիկներից մարդիկ չեն առաջանում, ուրեմն նշանակում է, որ Աստված մարդուն ստեղծել է, որ նա զերծ մնա կապիկություններից:

 -Կապիկություն անելը մարդի՞կ են կապիկներից սովորել, թե՞ կապիկները` մարդկանցից:

- Իհարկե, մարդիկ` կապիկներից:

 -Կապիկի դերն ու նշանակությունը հայ քաղաքականության պատմության մեջ:

- Օ, բարդ, շատ բարդ հարց է: Շատ ենք տեսել, իհարկե, մարդիկ, անձնական սկզբունքներին դավաճանելով, այնպես են կերպարանափոխվում, ոնց որ երեկվա տղամարդը չլինեն:

 -Քաղաքականության մեջ կապիկությունն արհե՞ստ է, թե՞ արվեստ:

- Կարծում եմ` արվեստ է: