Կոթի գյուղի 76-ամյա բնակչուհին Ադրբեջանում է. ԿԽՄԿ-ն հաստատում է

Կոթի գյուղի 76-ամյա բնակչուհի Լուսիկ Աբովյանը  գտնվում է Ադրբեջանի տարածքում: Այս մասին հայտնում է Կարմիր Խաչի միջազգային կոմիտեն, տեղեկացնում է  «Արմենպրես»ը:

«Մենք արդեն 2 կողմից հաստատում ունենք, որ Հայաստանի քաղաքացին հատել է միջազգային սահմանը և հայտնվել Ադրբեջանում: Ստանալով երկողմանի հաստատումը` ԿԽՄԿ-ն, համաձայն իր գործելաոճի, աշխատում է այն ուղղությամբ, որպեսզի ստանա անհապաղ տեսակցության հնարավորություն քաղաքացու հետ»,- ասել է ԿԽՄԿ Հայաստանի գրասենյակի հաղորդակցման ծրագրերի պատասխանատու Զառա Ամատունին:

Ավելի վաղ ադրբեջանական լրատվամիջոցները տեղեկացրել էին, որ   1942թ. ծնված Լուսինե Աբովյանը նոյեմբերի 8-ին հատել է հայ-ադրբեջանական սահմանը և գտնվում է Ղազախի շրջանում:

Yerkir.am-ի հետ զրույցում ՀՀ ոստիկանության լրատվության և հասարակայնության հետ կապերի բաժնի աշխատակից Արմեն Մալխասյանը նշել էր, որ կինն արդեն 2 օր է` անհայտ կորած է համարվում: «Նա որոնվում է ոստիկանության կողմից, որոնողական աշխատանքները շարունակվում են»,- ասաց նա: