Մենք կարող ենք ավելի շատ ներդրումներ գրավել, բայց բախվում ենք պետական պարտքի խնդրի հետ. Պավել Սաֆարյան

Այսօր կառավարությունը ԱԺ-ին է ներկայացնում 2016թ. պետական բյուջեի նախագիծը:

Հիմնական զեկուցող՝ ֆինանսների փոխնախարար Պավել Սաֆարյանին հարց տվեց ԱԺ ՀՅԴ խմբակցության պատգամավոր Արծվիկ Մինասյանը: «Հարցերի հարցը ոչ թե բյուջեի ֆորմալ ցուցանիշներն են, ինչը տարվող քաղաքականության պատկերն է, և ինչպիսի տնտեսություն կա, այնպիսի բյուջե ունենք, այլ խնդիրը վարվող սոցիալ-տնտեսական քաղաքականությունն է: Երկիրը և հասարակությունը որոշակի բացասական սպասումների մեջ են: Հիմա ինչպե՞ս պետք է դուրս գալ այս վիճակից: Որո՞նք են այն հիմնական գործիքները, որոնք կառավարությունը ցանկանում է կիրառել»,- հարցրեց նա:

Պատգամավորին նաև հետաքրքրում էր՝ արդյո՞ք կառավարության վարած հարկային քաղաքականությունը ինքնանպատակ չէ, եթե դա չի ուղեկցվելու սոցիալ-տնտեսական համալիր քաղաքականությամբ: Արծվիկ Մինասյանի խոսքով՝ բյուջեի նախագծում ԵՏՄ-ի մասին, որպես հնարավորություն, խոսք չկա, թե որ ճյուղերն ենք առանձնացնում, որոնք ինտեգրացիոն համակարգում հաջողություններ կգրանցեին: «Ի՞նչ նոր գաղափարներ ու ծրագրեր ենք ուզում տեսնել երկրի տնտեսական զարգացման առանցքում, ի՞նչը կարող է բերել ներդրումների խրախուսման»,- հարցրեց նա:

Պատգամավորի մյուսը հարցը վերաբերում էր նրան, թե ինչու բյուջեի նախագծի ռիսկերի բաժնում չկա որևէ վերլուծություն, թե սահմանադրական փոփոխությունների ընդունման դեպքում դա ինչ ազդեցություն կարող է ունենալ բյուջեի վրա: Արծվիկ Մինասյանը հարցրեց, թե ի՞նչ քայլեր պետք է ձեռնարկի կառավարությունը, որ տրանսֆերտների նվազման պարագայում կարողանա կառավարել ֆինանսական հոսքերը:

Միգրացիայի մասին խոսելիս Արծվիկ Մինասյանը ասաց. «Ես, իհարկե, համամիտ չեմ Հրանտ Բագրատյանի հետ, որ դրա համար են մնում, գերակշիռ մասը շատ սիրում է իր հայրենիքը, դրա համար է մնում ու գործունեություն ծավալում»:

Պատգամավորը հարց ուներ նաև կուտակայինի մասին, թե կա՞ գնահատական, որ կառավարության կողմից այդքան քաջալերած կուտակային համակարգի կիրառումը ինչ ազդեցություն ունեցավ՝ ներդրումների տեսակետից: 

«Հասարակության սպասումները բացասական են, և այդ պայմաններում ցանկացած կառավարության հիմնական գործը պետք է լինի, սպասումների համաձայն, մոդելներ կառուցելն ու դրական սպասումների վերածելը»,- ասաց Արծվիկ Մինասյանը:

Պավել Սաֆարյանը պատասխանեց պատգամավորի հարցերին՝ ասելով, որ կառավարությունն այլ ճանապարհ չունի, քան ներդրումների ավելացումը, հակառակ դեպքում՝ չեն կարող խոսել մեծ արդյունքների մասին:

«Ինքներս էլ բավարարված չենք այս վիճակից, մենք ուղղակի ասում ենք, որ սա իրատեսական վիճակն է: Կառավարությունն ընկալում է, որ պետք է ավելացնի ներդրումները, ուղղակի հնարավորությունների խնդիր է: Մենք կարող ենք ավելի շատ ներդրումներ գրավել, բայց այդտեղ էլ բախվում ենք պետական պարտքի խնդրի հետ»,- ասաց փոխնախարարը՝ հիշեցնելով, որ կառավարությունը չի դադարեցրել կատարել իր սոցիալական պարտավորությունները՝ ձգտելով չկուտակել պարտքեր:

Ինչ վերաբերում է սահմանադրական փոփոխությունների դեպքում ազդեցության գնահատականի բացակայությանը, Պավել Սաֆարյանը նշեց, որ ենթադրել են, թե սահմանադրական փոփոխությունների ընդունումը լրացուցիչ ծախսեր չի առաջացնի: