Աչաջուրցի 33-ամյա տղամարդուն մեղադրանք է առաջադրվել

Տավուշի մարզի Աչաջուրի գյուղապետի, նրա որդու դեմ մահափորձի և Աչաջուրի բնակիչ Մեխակ Մելիքբեկյանի առևանգման հետ կապված քրեական գործերի շրջանակում հիշյալ գյուղում դեռևս փետրվարին կատարված խուզարկության արդյունքներով հայտնաբերված զենքի մասով գործը դատարանում է: Այս գործով մեղադրանք է առաջադրված Աչաջուր գյուղի բնակիչ` 33-ամյա Արթուր Մելիքբեկյանին:

Մեղադրական եզրակացության համաձայն՝ Արթուր Մելիքբեկյանն ապօրինի ձեռք է բերել և իր` Տավուշի մարզի Աչաջուր գյուղի տանն ապօրինի պահել է որսորդական ակոսափող հրազեն հանդիսացող` 5,45 տրամաչափի «Սայգա ՄԿ» տեսակի կարաբին և որսորդական ակոսափող զենքերից կրակելու համար նախատեսված, ռազմամթերք հանդիսացող` 11 հատ 5,45 տրամաչափի փամփուշտներ: Մելիքբեկյանին մեղադրանք է առաջադրվել ՀՀ ՔՕ 235-րդ հոդվածի հատկանիշներով (ապօրինի զենք զինամթերք պահելը): Նրա նկատմամբ խափանման միջոց է ընտրվել չհեռանալու մասին ստորագրությունը:

Հիշեցնենք, որ առևանգման գործով կալանավորված է Աչաջուրի գյուղապետի որդին՝ Հովհանես Ղալթաղչյանը, իսկ նրա դեմ կատարված մահափորձը թաքցնելու համար կալանավորված են ոստիկանության Իջևանի բաժնի նախկին պետն ու Նոր Նորքի քրեական հետախուզության բաժնի պետը (այն ժամանակ զբաղեցրել է Իջևանի բաժնի քրեական հետախուզության բաժանմունքի պետի պաշտոնը):

Նշենք, որ Մ. Մելիքբեկյանը հայտնել էր, որ իրեն առևանգել են և պարտադրել ստանձնել գյուղապետի նկատմամբ սպանության փորձ կատարելու մեղադրանքը: Արդյունքում` Մելիքբեկյանը ճանաչվել է տուժող, իսկ գյուղապետի որդուն մեղադրանք է առաջադրվել անձի առևանգման համար: Ավելի վաղ էլ հայտնել էինք, որ ՀՔԾ-ն քրեական գործ է հարուցել քննչական կոմիտեում առևանգման և մահափորձի գործը քննող` ՔԳՎ քննիչ Վ. Հովհաննիսյանի դեմ: