Մարդիկ իրենց մաշկի վրա չեն զգում տնտեսական աճը, գուցե, որովհետև մաշկի խնդիր ունեն. Կարեն Ճշմարիտյան

Այսօր էկոնոմիկայի նախարար Կարեն Ճշմարիտյանը լրագրողներին ներկայացրեց կառավարության նիստում հավանության արժանացած ներդրումային ծրագիրն ու միջոցառումների ժամանակացույցը` ասելով, որ մինչ այս ներդրումային քաղաքականությունը դեռևս փաստաթղթային, ծրագրային ձև չէր ստացել: Նախարարը նշեց, որ հայեցակարգով կառավարությունը կարևորում է մասնավոր հատվածում ներդրումների խրախուսումը, մրցակցության ապահովումը, մրցակցության հարգումը, հարկային քաղաքականության հաջող մշակումը և «կանաչ զարգացումը», այսինքն` էկոլոգիապես անվտանգ զարգացումը, պետություն-մասնավոր հատված գործընկերային հարաբերությունների զարգացումը: Նրա խոսքով` աշխարհում էլ ներդրումները պակասել են 14 տոկոսով:

Հարցին, թե որքանո՞վ է գրավիչ Հայաստանը օտարերկրյա ներդրողների համար, Կարեն Ճշմարիտյանը պատասխանեց, որ, տնտեսական աճի առումով, տարածաշրջանի երկրներից միայն Ղրղզստանն է, որ ավելի ցուցանիշ ունի Հայաստանից, և միայն Հայաստանն է, որ ունի արտահանման աճ, սակայն, նախարարի խոսքով, դեռևս գոհ չեն այդ ցուցանիշներից և իրականացնում են աշխատանքներ, որ թերությունները շտկվեն:

«4 տոկոս տնտեսական աճը բավարար չէ, բայց արտաքին ազդեցությունները պետք է հաշվի առնել և իրականության հետ հաշվի նստել: Մեծ ջանքեր պետք է գործադրվեն, մեզ պետք է նաև հանրային աջակցությունը, սա ընդհանուր միջավայրի հարց է»,- ասաց Կարեն Ճշմարիտյանը:

Նախարարը շեշտեց, որ եթե հույս չունենային, որ այս փաստաթուղթը նպաստելու է ներդրումների ավելացմանը, ապա ոչինչ չէին անի, հայեցակարգ չէին ընդունի:

Կարեն Ճշմարիտյանը նշեց նաև, որ Հայաստանում ամենախոշոր ներդրողներից է Գերմանիան` մշակող արդյունաբերության, մանրածախ ու մեծածախ առևտրի ոլորտում, հանքագործական արդյունաբերության, ՏՏ և կապի ոլորտներում: Գերմանիային հաջորդում են Կիպրոսը, Արգենտինան, ԱՄԷ-ն, Կանադան: ԵՏՄ երկրներից առաջատարների ցուցակում դեռևս չկա որևէ երկիր:

Լրագրողների այն դիտարկմանը, որ հասարակ քաղաքացին չի լսում տնտեսական վերլուծություններ, ու երբ հայտարարվում է տնտեսական աճի մասին, նա պետք է իր մաշկի վրա զգա, նախարարը պատասխանեց. «Ես համաձայն եմ` բոլորս ենք ուզում մեր մաշկի վրա զգալ: Եվ եթե աշխատավարձերը բարձրանալիս մարդիկ իրենց մաշկի վրա դա չեն զգում, ուրեմն ես համաձայն չեմ դրա հետ: 4 տոկոս աճն այն աճը չէ, որը ժողովուրդը միանգամից պետք է զգա: Ես էլ կարող եմ մատնանշել ոլորտներ, որտեղ և\' եկամուտներն են ավելացել, և\' աշխատավարձերը, օրինակ` ինֆորմացիոն տեխնոլոգիաների ոլորտը, ջերմոցներում, տրանսֆորմատորների արտադրությունում, ոսկու նոր հանքավայրերում կամ Թեղուտում: Ինչպե՞ս կարող մարդն իր մաշկի վրա չզգալ, երբ 1500 մարդ Թեղուտում աշխատում է: Եվ եթե եկամուտների ավելացմամբ մարդիկ իրենց մաշկի վրա չեն զգում ազդեցությունը, ուրեմն... այդտեղ մենք մաշկի հետ խնդիր ունենք»,- ասաց Կարեն Ճշմարիտյանը: