Ինչո՞ւ էր «Փոքր Մհեր» կրթահամալիրի նախկին տնօրենը ժամանակից շուտ դուրս եկել կալանավայրից

Արդեն հայտնել ենք, որ այսօր առավոտյան Քանաքեռավանի իր տան բակում ծառից կախված վիճակում հայտնաբերված` «Փոքր Մհեր» կրթահամալիրի նախկին տնօրեն՝ 38-ամյա Էդգար Միքայելյանն ամիսներ առաջ էր դուրս եկել կալանավայրից: Կենտրոն և Նորք-Մարաշ վարչական շրջանների ընդհանուր իրավասության դատարանի ՝ 2014 թվականի դեկտեմբերի 15-ի վճռով՝ Միքայելյանը մեղավոր է ճանաչվել և դատապարտվել ազատազրկման երկու տարի ժամկետով: Նա պատիժը կրել է ՀՀ ԱՆ «Վարդաշեն» ՔԿՀ-ում: Պատժի կրման սկիզբը հաշվվել 2014 թվականի ապրիլի 2-ից:

ՀՀ ԱՆ քրեակատարողական վարչության հանրային կապերի պատասխանատու Գոռ Ղլեչյանը yerkir.am-ին տեղեկացրեց, որ Միքայելյանի պատիժն այս տարվա մարտի 9-ին փոխարինվել էր այլընտրանքայի պատժով՝ որոշակի ժամկետով հանրային աշխատանք կատարելը: Նշենք, որ, համաձայն ՀՀ քրեակատարողական օրենսգրքի, հանրային աշխատանքների կատարումը դատական ակտի հիման վրա ապահովում է ազատությունից զրկելու հետ չկապված պատիժների կատարման ստորաբաժանումը` իր որոշած վայրերում:

Yerkir.am-ի տեղեկություններով, սակայն, Միքայելյանի նկատմամբ կիրառված այլընտրանքային պատժի կիրառումը հետաձգվել էր՝ կապված նրա վերաբերյալ քննվող մեկ այլ՝ յուրացումների գործի հետ: