Սուրիկ Խաչատրյանը վերջին քսան տարում հայտարարգրել է քսան միլիոն դոլար. Նիկոլ Փաշինյան

Խորհրդարանում սահմանադրական բարեփոխումների շուրջ ընթացող քննարկումների ժամանակ պատգամավոր Նիկոլ Փաշինյանը հիշատակեց մի քանի դրվագներ, որոնք, ըստ նրա, չեն կարգավորվում ո\'չ գործող Սահմանադրությամբ, ո\'չ էլ բարեփոխված տարբերակով: Անդրադառնալով Սյունիքի մարզպետ Սուրիկ Խաչատրյանի տան բակում տեղի ունեցած դեպքերին` Փաշինյանը նշեց, որ Սուրիկ Խաչատրյանը նախկինում երեք անգամ դատապարտված է եղել, բայց այդ հանգամանքը նրան չի խանգարել դառնալ Սյունիքի մարզպետ:

Պատգամավորը նշեց նաև, որ թեև Սուրիկ Խաչատրյանը վերջին քսան տարում եղել է պետական պաշտոնյա, սակայն հայտարարագրել է քսան միլիոն դոլար:

Նա անդրադարձավ նաև ՀՖՖ նախագահ Ռուբեն Հայրապետյանի և «Էյր Արմենիա»-ի սեփականատեր Արսեն Ավետիսյանի միջև տեղի ունեցած միջադեպին, հայտարարեց, որ Ռուբեն Հայրապետյանը լողավազանի բազմաթիվ այցելուների աչքի առաջ ծեծի է ենթարկել և առևանգել «Էյր Արմենիա»-ի տնօրենին:

ԱԺ նախագահ Գալուստ Սահակյանը միջամտեց և նշեց, որ այս հարցադրումները որևէ կապ չունեն սահմանադրական բարեփոխումների շուրջ ընթացքող քննարկումների հետ: