Դե, հիմա թող մի բան էլ Ռուսաստանին ձեռ չտա. Հովիկ Աբրահամյան

Այսօր լրագրողների հետ զրույցում վարչապետն անդրադարձավ մի քանի հարցերի, մասնավորապես` օրեր առաջ արված այն հայտարարությանը, թե ռազմավարական նշանակության ապրանքների առեւտուրը պետք է անել ռուբլիով:

Վարչապետը եւս մեկ անգամ շեշտեց, որ խոսքը վերաբերել է ռազմավարական կարևոր նշանակության գործարքներին, մասնավորապես` գազ գնելուն, որովհետև դոլար-դրամ տատանումները մեծապես ազդում են Հայաստանի տնտեսության վրա, հետևաբար, ցանկալի կլինի, որ ռուբլիով վճարումները կատարվեն, այլ ոչ թե դոլարով, որն անընդհատ տատանվում է:

«Պայմանավորվել ենք, որ ԵՏՄ անդամ երկրների համապատասխան կառույցները չորրորդ եռամսյակում քննարկեն այդ հարցը: Այդ հարցն այդքան արագ չի կարող լուծվե , բայց կարևորն այն է, որ այն մենք ընդգրկել ենք օրակարգի մեջ: Իմ կարծիքով` մենք շատ լավ առաջարկ ենք արել, դուք դրա մեջ վատ բան մի փնտրեք, ուղղակի մենք ուզում ենք լուծում տալ կարևոր տնտեսական խնդիրներին. ռուբլիով վճարելը շատ դրական կանդրադառնա մեր տնտեսության վրա»,- ասաց Հովիկ Աբրահամյանը:

Լրագրողների հարցին, թե հնարավո՞ր է, որ Ռուսաստանը մերժի, քանի որ նրան էլ ռուբլիով վճարելը կարող է ձեռնտու չլինել, Հովիկ Աբրահամյանը պատասխանեց, որ ԵՏՄ անդամ երկրներից դեռ որևէ արձագանք չի եղել: «Դե, հիմա Ռուսաստանը մեր ռազմավարական դաշնակիցն է, մենք ԵՏՄ գործընկերներ ենք, թող մի բան էլ իրենց ձեռ չտա, բայց Հայաստանի տնտեսությանը ձեռ տա»,- հավելեց վարչապետը: