Շատ մերձավորների ցավեցնելու ենք, թող սա մեսիջ լինի. Հովիկ Աբրահամյան

Հաղթանակի այգում մայիսի 9-ի տոնական միջացառումից առաջ լրագրողների հետ զրույցում վարչապետ Հովիկ Աբրահամյանն անդրադարձավ կառավարության ծրագրին. տեղեկացնում է Yerkir.am-ի թղթակիցը:

Վարչապետն ասել է, որ ծրագրով նախատեսված փոփոխություններն ինքնանպատակ չեն լինելու, աշխատելու են, որ լինի հնարավորինս իրատեսական ծրագիր, եւ ասելու են այն, ինչը կարողանալու են անել:

«Մեծ փոփոխություններ ես չեմ ակնկալում»,- հայտարարեց Հովիկ Աբրահամյանը եւ ընդգծեց, որ հստակեցվելու են ծրագրի բոլոր դրույթները:

Վարչապետը եւս մեկ անգամ կրկնեց, որ կառավարության այն անդամները, ովքեր չեն կարողանալու իրականացնել ծրագրի իրենց մասը, նրանց հետ անցնելու ճանապարհ ինքը՝ վարչապետը, չունի: «Այլեւս դանդաղելու հնարավորություն չկա»,- նշեց նա:

Հովիկ Աբրահամյանը համամիտ է այն տեսակետին, որ կա անվստահության մթնոլորտ: Նա վստահեցրեց, որ «իրատեսական ծրագրերով, ոչ ստանդարտ քայլերով վերացնելու են այդ անվստահությունը»: Նա համաձայն է նաեւ, որ մեծ խնդիրներ կան տնտեսության մեջ, նաեւ շատ են անելիքները:

«Հավասար դաշտ է ստեղծվելու: Շատ, շատ մերձավորների ցավեցնելու ենք: Դա բոլորը պետք է հասկանան՝ իմ մերձավորները: Ես ինձանից եմ սկսելու: Հավասար դաշտի ստեղծումը դա իմ սկզբունքն է լինելու, եւ սա թող մեսիջ լինի իմ բոլոր մերձավորներին»,-հայտարարեց վարչապետը: