Ի սկզբանե եղել եմ պառլամենտական կառավարման համակարգի կողմնակից. Վարդան Պողոսյան

Այն պաշտպանական ու անվտանգության համակարգը, որը նախատեսվում է այս համակարգով, ավելի կայուն է, քան այն համակարգը, որը կա ներկայիս գործող Սահմանադրությամբ: Այս մասին լրագրողներին ասաց սահմանադրական բարեփոխումների հանձնաժողովի անդամ Հրայր Թովմասյանը:

Որ քաղաքական ուժը ձևավորում է կառավարությունը, նա էլ պատասխանատու է ազգային  անվտանգության և պաշտպանության համար: «Ոչ ոք չի կարող ասել, որ Գերմանիայի ու Իսրայելի պաշպանական համակարգը ավելի թույլ է, քան, ասենք, Բոլիվիայի ու Ֆրանսիայի պաշտպանական համակարգերը»,- ասաց Հրայր Թովմասյանը:

Լրագրողների դիտարկմանը, որ 10 տարի առաջ էլ նույն ձևով գովաբանում էին ներկայիս Սահմանադրությունը, սահմանադրական բարեփոխումների հանձնաժողովի անդամ Վարդան Պողոսյան նշեց, որ սահմանադրական իրավունքի մասնագետը պետք է օբյեկտիվ գնահատական տա ցանկացած տեքստի, ճիշտ մեկնաբանի ու ցույց տա, թե ինչ հնարավորություններ է տալիս Սահմանադրության նոր տեքստը:

«Այն ժամանակ էլ Սահմանադրության թերությունները պարզ էին ու մատնանշված և, ցավոք, այն ժամանակ էլ հաշվի չեն առնվել: Ես ի սկզբանե եղել եմ պառլամենտական կառավարման համակարգի կողմնակից: Սա չի նշանակում, որ ներկայացված նախագծի հետ ես չունեմ խնդիրներ, կլինեն տարբեր կարծիքներ, շտկումներ, բայց կարող եմ հավաստել, որ այս նախագծի կորիզը լիովին համապատասխանում է իմ սահմանադրական համոզմունքներին»,- ասաց Վարդան Պողոսյանը: