Մեկ ամիս էլ կանգնեինք Բաղրամյանում, բայց արդյո՞ք դրանով հարց կլուծվեր. ակտիվիստ

«Ոչ թալանին» նախաձեռնության անդամներն այսօր հանդիպեցին լրագրողների հետ եւ ներկայացրեցին ստեղծված իրավիճակը:

Նախաձեռնության անդամներից Արթուր Քոչարյանը հայտարարեց, որ ոչ մի պառակտում էլ չկա իրենց թիմում: Իսկ այն, ինչ կատարվեց երկու օր առաջ, երբ մի մասը գնաց Ազատության հրապարակ, իսկ մի մասը մնաց Բաղրամյանում, հավանաբար, սխալ արտահայտվելու արդյունք էր. Վաղինակ Շուշանյանը տեքստից դուրս փորձել է բացատրել իրավիճակը, ինչն էլ, հավանաբար, լավ չի ստացվել:

Քոչարյանը տեղեկացրեց, որ հիմա խոսում են մասնագետների՝ իրավաբանների եւ տնտեսագետների հետ` իրավիճակն ավելի խորությամբ հասկանալու համար:

Լրագրողների հարցին, թե, ի վերջո, ինչո՞ւ որոշեցին դուրս գալ Բաղրամյան պողոտայից, Արթուր Քոչարյանը պատասխանեց. «Մեկ ամիս էլ կանգնեինք Բաղրամյանում, բայց արդյո՞ք դրանով հարց կլուծվեր»: Նա նաեւ հայտարարեց, որ հիմա Բաղրամյան պողոտայում չկա շարունակություն, չկա պահանջ:

«Փողոց փակելը չպետք է լինի սովորական քայլ,  այն պետք է կոնկրետ գործիք լինի: Աստված չանի` խաբեության դիմեն աուդիտի մասով, ոչ թե միայն Բաղրամյանը, այլև շատ ավելի փողոցներ կփակենք»,- ասաց ակտիվիստը:

Ի դեպ, նա նաեւ տեղեկացրեց, որ պայքարի օրերին չեն տեսել այն մարդկանց, ովքեր հիմա Բաղրամյան պողոտայում միկրոֆոն են վերցրել: