Տիգրան Սարգսյանը դատի է տվել գործարարին՝ պահանջելով նրանից գումար բռնագանձել

Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը քննության է առել ՀՀ նախկին վարչապետ, ԱՄՆ-ում ՀՀ դեսպան Տիգրան Սարգսյանը հայցն ընդդեմ գործարար Փայլակ Հայրապետյանի: Հայցվոր Տ. Սարգսյանը պահանջել է զրպարտություն հանդիսացող փաստացի տվյալները հերքել և Հայրապետյանից բռնագանձել մեկ միլիոն ՀՀ դրամ գումար:

Նշենք, որ խոսքը վերաբերում է օֆշորային սկանդալի վերաբերյալ shamshyan.com կայքում հրապարակված ՝ Փայլակ Հայրապետյանի հայտարարություններին:

Գործով, որպես երրորդ անձ, ներգրավվել է Գագիկ Շամշյանը:

Տիգրան Սարգսյանի ներկայացուցիչն է «Կոնցեռն-Դիալոգ» փաստաբանական գրասենյակի ավագ գործընկեր Արամ Օրբելյանը, իսկ Փայլակ Հայրապետյանը, ըստ մեր տեղեկությունների, դեռևս ներկայացուցիչ չունի: Հիշյալ գործով առաջին դատական նիստը նշանակվել է հունիսի 9-ին:

Հիշեցնենք, որ դեռևս երկու տարի առաջ Փայլակ Հայրապետյանը բարձրաձայնեց ՀՀ նախկին վարչապետ Տիգրան Սարգսյանի և Արարատյան հայրապետական թեմի առաջնորդ Նավասարդ Կճոյանի օֆշորային մեքենայությունների մասին, որոնք, ըստ նրա, հիմք էին դարձել իր սնանկացման: