Վարդան Պետրոսյանի գործով դատաքննությունը վերսկսվեց. պահանջեցին դերասանից միլիոնավոր դրամներ բռնագանձել

Կոտայքի մարզի ընդհանուր իրավասության դատարանի դատավոր Վաղինակ Մկրտչյանը քիչ առաջ որոշում կայացրեց վերսկսել Վարդան Պերոսյանի մասնակցությամբ տեղի ունեցած վթարի գործով դատաքննությունը:

Նշենք, որ այս գործով դատաքննությունն արդեն ավարտվել էր, նախատեսված էր, որ այս դատական նիստի ընթացքում ճառով հանդես կգա դատախազ Արթուր Սարգսյանը, սակայն մինչ այդ գործով տուժողների և տուժողների իրավահաջորդների ներկայացուցիչ Ռուբեն Բալոյանը քաղաքացիական հայց ներկայացրեց: 

Ըստ նրա` հիմնավորվեց, որ հոկտեմբերի 20-ին տեղի ունեցած վթարի մեղավորը ամբաստանյալ Վարդան Պետրոսյանն է: Նա միջնորդեց Վարդան Պետրոսյանից հօգուտ գործով տուժող Տաթևիկ Հակոբյանի բռնագանձել 10.165.213 ՀՀ դրամ` նրա բուժման, ինչպես նաև 2,5 տարվա փոխադրման ծախսերի ու փաստաբանի խելամիտ վարձատրության համար:

Բալոյանը մանրամասն ներկայացրեց նաև մյուս տուժողներին պատճառված վնասի չափերը: Մասնավորապես` նա միջնորդեց Վ. Պետրոսյանից հօգուտ տուժող Արթուր Հակոբյանի բռնագանձել 1.145.800 ՀՀ դրամ: Նաիրա Հայրապետյանին և Աննա Կարապետյանին պատճառված և հատուցման ենթակա վճարը յուրաքանչյուրի դեպքում 400 հազար դրամ է, Հայկ Հակոբյանինը՝ 250 հազար դրամ, Էմմա Հակոբյանինը՝ 250 հազար դրամ: