Ես չունեմ «լյուբիմչիկներ» բուհերի մեջ. Աշոտյանը կարծում է` Լոմոնոսովի համալսարանի մասնաճյուղի բացումը կխթանի մրցակցությունը

Մոսկվայի Լոմոնոսովի անվան համալսարանի մասնաճյուղի բացումը նաև քաղաքական որոշում է, քանի որ այն ամրապնդելու է հայ-ռուսական հումանիտար կապերը. այսօր լրագրողներին ասաց ՀՀ ԿԳ նախարար Արմեն Աշոտյանը:

Նա նշեց նաև, որ, չնայած դրան, բուհի մասնաճյուղի բացումը Հայաստանում իրենց համար նախևառաջ կրթական որոշում է: Նախարարը նշեց, թե շատերն այն համարում են երկրորդ ռուսական բուհի բացում` մոռանալով, որ հայ–ռուսական /սլավոնական/ համալսարանը նաև հայկական բուհ է, ինչպես, օրինակ, ֆրանսիականը` հայ-ֆրանսիական, իսկ ամերիկյանը` հայ-ամերիկյան: Աշոտյանը հիշեցրեց, որ սլավոնական համալսարանն այս տարի ստացել է թույլտվություն` դասավանդել նաև հայերենով։

«Սա չի կարող ռուսամետ քայլ համարվել, եթե այդպես է`ինչո՞ւ արևմտամետ չէիք որակում ինձ, երբ, ասենք, ֆրանսիական լիցեյի բացման մասին էր խոսք գնում: Մենք, ի վերջո, բացում ենք լավագույն բուհերի մեկի մասնաճյուղը Հայաստանում, և ես մրցակցության ու ընդհանուր որակի պատասխանատու եմ, չունեմ «լյուբիմչիկներ» բուհերի մեջ: Մենք այս պահին չունենք նման միջազգային բուհերից մեկի մասնաճյուղն այստեղ բացելու այլ առաջարկություն»,- ասաց Աշոտյանը` հավելելով, որ ավելի լավ չէ՞, որ ուսանողը մնա Հայաստանում և այստեղ կրթություն ստանա, քան մեկնի Մոսկվա: