Մենք շահագրգիռ ենք, որ Լոմոնոսովի մասնաճյուղը բացվի ՀՀ-ում, քանի որ այն բրենդային բուհ է. ԿԳ նախարար

«Ինչ լինում է` ռուսաց լեզվի հետ կապված, միշտ բացասական հրապարակումներ են լինում: Այդ ինչո՞ւ ոչ ոք չանդրադարձավ այն փաստին, որ Հայաստանում Ամերիկյան համալսարանը նաև բակալավրիատ բացեց»,- լրագրողների հետ հանդիպման ժամանակ ասաց ՀՀ ԿԳ նախարար Արմեն Աշոտյանը` անդրադառնալով Հայաստանում Մոսկվայի Լոմոնոսովի անվան համալսարանի մասնաճյուղի բացմանը:

Նախարարը նշեց, որ եթե ստացվի այստեղ Լոմոնոսովի անվան պետական համալսարանի մասնաճուղը բացել, այդպիսով հնարավոր կլինի խթանել մրցակցությունը:

«Այո, մենք շահագրգիռ ենք, որ բուհի մասնաճյուղն ունենանք Հայաստանում, քանի որ այն բրենդային բուհ է: Արդեն 5 տարի է` բանակցություններ ենք վարում և այժմ եկել` պայմանագրային հանգրվանին ենք հասել: Մեր կառավարությունը հավանության է արժանացրել մեր ցանկությունը, և այժմ սպասում ենք իրենց որոշմանը»,- ասաց նախարարը:

Նա տեղեկացրեց նաև, որ բուհի մասնաճյուղն ունեցող երկրներն իրենք են հոգում ֆինանսական բոլոր հարցերը, և քանի որ Հայաստանը պետբյուջեի հաշվին չի կարող ամբողջությամբ լուծել առաջ եկող ֆինանսական հարցերը, ԿԳՆ-ն նաև մասնավոր հատվածին կներգրավի այս գործում: