Խադիջա Իսմայիլովայի դեմ բողոքած ադրբեջանցին հայտարարել է, որ իրեն ստիպել են դա անել

Թուրալ Մուստաֆաևը, ում բողոքի հիման վրա ձերբակալել էին ադրբեջանցի հայտնի լրագրող Խադիջա Իսմայիլովային, սենսացիոն խոստովանություն է արել՝ հայտարարելով, որ բողոքել է նրա դեմ իրավապահ մարմինների ճնշման ներքո. հայտնում է contact.az-ը: Իր ուղերձը նա տեղադրել է YouTube ցանցում։

Մուստաֆաևը պատմել է, որ 2014-ի հոկտեմբերի 20-ին իսկապես թույն է խմել ինքնասպանության նպատակով։ Սակայն քննության ընթացքում Բաքվի դատախազի տեղակալ Ազեր Ասքերովն ու քննիչ Վագիֆ Սուլեյմանովը պարտադրել են դիմում գրել, որ իրեն ինքնասպանության է դրդել Իսմայիլովան։ Նա պատմել է, որ իրեն նաև շանտաժի են ենթարկել իր տանը գաղտնի նկարահանված տեսանյութի միջոցով:

Մուստաֆաևը պատմել է, որ 2014-ի դեկտեմբերի 27-ին Facebook սոցցանցի իր էջում ինքը գրել է, որ հրաժարվում է Իսմայիլովայի դեմ բողոքից ու փորձել է մեկնել Մոսկվա։ Սակայն դատախազությունն արգելել է նրա ելքը երկրից:  Նրան ձերբակալել են Գոյչայի շրջանի ոստիկանները: Նրան հասցրել են Բաքու և տնային կալանքի տակ պահել վարձու բնակարանում: Փետրվարի 14-ին Մուստաֆաևին տեղափոխել են հոգեբուժարան և ստիպել հոգեմետ դեղեր խմել։

Ապրիլի 8-ին նա դիմում է գրել գլխավոր դատախազին ու հայտնել, որ հրաժարվում է բողոքել Իսմայիլովայի դեմ ու խնդրում է հանել երկրից դուրս գալու արգելքը, սակայն նրան դարձյալ սպառնացել են, որ բողոքը հետ վերցնելու դեպքում լուրջ խնդիրներ կունենա:

Չնայած այս ամենին՝ Մուստաֆաևը հրաժարվում է բողոքից։ Turan-ի հետ զրույցում նա ասել է, որ մայիսի 5-ի առավոտյան իրեն Քննչական կոմիտե են կանչել։ Նա փաստաբան է փնտրում, որպեսզի հետը գնա հարցաքննության։