Քիշնևում տապալվել է Հայոց ցեղասպանության մասին ֆիլմի ցուցադրությունը

 Քիշնևում տապալել են Հայոց ցեղասպանության մասին թուրք ռեժիսոր Ֆաթիհ Աքընի «Սպի» ֆիլմի ցուցադրությունը: Այդ մասին РИА Новости-ին հայտնել է Մոլդովայի հայկական համայնքի նախագահ, քաղաքագետ Էռնեստ Վարդանյանը: Ըստ նրա՝ հրահանգը ստացվել է կառավարական շրջանակներից:

Հաղորդվում է, որ այս օրերին Մոլդովայում անցկացվում են Հայոց ցեղասպանության զոհերի հիշատակի օրեր: Քիշնևում կազմակերպվել են համաժողովներ և սգո հանրահավաքներ: Հիշատակի միջոցառմանը հրավիրվել են մոլդովացի հայտնի անձինք, լրագրողներ, քաղաքական գործիչներ, քաղաքացիական ակտիվիստներ, տարբեր երկրների դեսպաններ:

«Ակնհայտ է, որ ֆիլմի ցուցադրության տապալումը Մոլդովայում դիվանագիտական սկանդալ կառաջացնի: Դեսպանները հեռացան՝ վիրավորված տեղի ունեցած միջադեպից: Հայաստանի ԱԳՆ-ն արդեն տեղեկացվել է կատարվածի մասին»,- նշել է Վարդանյանը: