Հռոմի պապի ելույթը միասնականության կոչ էր. Ռազմիկ Դավոյան

Մարդասիրական կոչերից դուրս էր Հռոմի պապի խոսքը, այն նաև քաղաքական ենթատեքստ ուներ. լրագրողների հետ հանդիպման ժամանակ  կարծիք հայտնեց գրող Ռազմիկ Դավոյանը` անդրադառնալով Հռոմի պապի` «ցեղասպանություն» բառն արտասանելուն և ելույթին: Ըստ նրա` Պապի ելույթը կարևոր ուղերձ ուներ` հայերի պահանջն արդար է:

«Պապն իր ելույթով ընդգծում էր, որ Ցեղասպանություն տեղի է ունեցել և այն դատապարտել է պետք: Նա միասնականության կոչ էր անում ոչ միայն աշխարհի ժողովուրդներին, այլ նաև մեզ` հայերիս: Կարծում եմ, որ մենք, համախմբվելով, ավելի շատ բան ձեռք կբերենք, քան Թուրքիայի կողմից Ցեղասպանության ճանաչմամբ»,- ասաց Դավոյանը:

Կարևորելով Հռոմի պապի ելույթը` նա նշեց, որ բոլորս էլ լավ գիտենք, թե Պապի յուրաքանչյուր խոսքն ինչ ազդեցություն ունի ոչ միայն կաթոլիկների, այլ նաև աշխարհի քրիստոնյաների և ոչ քրիստոնյաների համար:

Գրականագետ Վարդան Դևրիկյանի կարծիքով էլ` կարևոր էր, որ քաղաքական հարցադրումները հոգևոր հողի վրա եղան: «Նախ պետք է ասել, որ ամեն ինչ անթերի էր կազմակերպված, և կարծես հայության խճանկարն էր հավաքված Սուրբ Պետրոսի տաճարում: Պապի ելույթը մեզ ընձեռված հնարավորություն էր, որից մենք կարող ենք օգտվել` Եվրոպայում մեր ներկայությունը ցույց տալու առումով: Մենք գիտենք, որ Պապի յուրաքանչյուր խոսքը դոգմա է դառնում, ֆիքսվում է, ուստի նրա ելույթը շատ կարևոր էր մեզ համար»,- ասաց նա:

Ըստ Դևրիկյանի` Վատիկանի կողմից Ցեղասպանությանը մի շարք անդրադարձներ են եղել, բայց ոչ այս կոնտեքստում, քանի որ մինչ այդ ուղղակի նշում էին, թե քրիստոնյաների նահատակություն է տեղի ունեցել, ոչ թե` ցեղասպանություն: