Թուրքիայում ահաբեկչական քարոզչության մեղադրանքով 4 թերթերի նկատմամբ հետաքննություն է սկսվել

Կ.Պոլսի գլխավոր դատախազությունը հայտնի Hürriyet, Cumhuriyet, Posta և Bugün թերթերի նկատմամբ հետաքննութուն է սկսել՝ «ահաբեկչական գործողություններ քարոզելու» մեղադրանքով:

Ըստ «Ակօս»-ի՝ վերջին օրերին տեղի ունեցած ահաբեկչական գործողությունները քարոզչական մեթոդներով լուսաբանելու մեղադրանքով  հետաքննություն է սկսվել:

Ի դեպ, մահացած դատախազ Մեհմեդ Քիրազի հուղարկավորման արարողությանը ոչ բոլոր լրատվամիջոցներին է թույլատրվել լուսաբանել, և որոշումը վարչապետ Դավութօղլուն է կայացրել:

Նա պնդել է, որ նման որոշման պատճառը եղել է այն, որ որոշ լրատվամիջոցներ դատախազին պատանդ վերցնելու մասին նյութը հրապարակել են այն լուսանկարով, որում դատախազի գլխին ահաբեկիչները ատրճանակ են պահել:

Լրատվամիջոցների այդ հրապարակումները որպես անպատվություն որակած Դավութօղլուն ասել է. «Ես եմ ԶԼՄ-ների հավատարմագրման հրահանգը տվել: Դրա համար իմ հասցեին ուղղված բոլոր քննադատություններին ես պատրաստ եմ»: