Շղթան պետք է մի տեղից կտրել. հայ պատգամավորները բարձրաձայնում են ոչ անկախ դատական համակարգի մասին

ԱԺ-ում ընթանում է «Եվրանեսթ»-ի ԽՎ չորրորդ լիագումար նիստը, որտեղ քննարկվում է ԵՄ ֆինանսական աջակցությունը արդարադատության ոլորտում:

Հայկական պատվիրակության անդամ, «Ժառանգություն» խմբակցության պատգամավոր Թևան Պողոսյանը, խոսելով արդարադատության համակարգի մասին, նշեց. «Հետսովետական երկրներում անկախ դատական համակարգ գոյություն չունի: Իմ համոզմամբ` պետք է մեծ ուշադրություն դարձնել կրթությանը, քանի որ մեր իրավական համակարգի սկիզբը գալիս է այն մասնագետներից, ովքեր սերնդի մոտ կձևավորեն անկախ դատավորի հոգեբանությունը:

Ցավոք, մեր երկրներում արդարադատության ոլորտի բարեփոխումների համար կա խնդիր, որովհետև կոռուպցիա կա իրավապահ համակարգում, կրթական համակարգում, և եթե այդ շղթան մի տեղից չկտրենք, այդպես էլ շարունակվելու է»:

ՕԵԿ խմբակցության պատգամավոր Մհեր Շահգելդյանը նշեց, որ կարևոր է դատական համակարգի անկախությունը գործադիր իշխանությունից և անկախություն դատավորների կորպորատիվ խաղի կանոններից:

ԲՀԿ նախագահ Նաիրա Զոհրաբյանը ևս նշեց, որ անկախ դատական համակարգը Հայաստանի լրջագույն խնդիրներից է, և որ բոլոր սոցիոլոգիական հարցումները ցույց են տալիս, որ Հայաստանի հասարակությունը բողոքում է դատական համակարգում կոռուպցիայի մակարդակից, ուստի կուզենար, որ հետագա փաստաթղթերում, որոնք կընդունվեն Հայաստանի հետ, հիմնական շեշտադրումներից մեկը լիներ անկախ դատական համակարգի հարցը, որովհետև այսօր դա Հայաստանի թիվ մեկ խնդիրն է: