Անկախ դատական համակարգի երաշխավոր է դառնում բացասական վարկանիշով առաջամարտիկ Արմեն Դանիելյանը. նա ընտրվեց ԲԴԽ անդամ

Վերաքննիչ քրեական դատարանի դատավոր Արմեն Դանիելյանն ընտրվեց ԲԴԽ անդամ։ Արմեն Դանիելյանի օգտին կողմ է քվեարկել 132 դատավոր։ Այս մասին հայտնում են ԲԴԽ-ից։

Ասել է թե՝ քվեարկությանը մասնակցած 253 դատավորից 132-ը որպես դատական համակարգի անկախության «երաշխավոր տեսնում է» Արմեն Դանիելյանին, որը տարիներ շարունակ համարվել է ամենացածր վարկանիշն ունեցող դատավորը։ 2023թ․ Դանիելյանը, թեև զիջել է ամենացածր վարկանիշում առաջինը լինելու տեղը ԲԴԽ նախագահ Կարեն Անդրեասյանին (-42 ), սակայն շարունակում է պահպանել 0-ից ցածր վարկանիշը՝ ունենալով -17 գնահատական։

Նշենք, որ Արմեն Դանիելյանը միակ թեկնածուն էր, քանի որ քանի որ ծանուցված մյուս բոլոր դատավորները դիմումներ են ներկայացրել դատական դեպարտամենտին՝ խնդրելով իրենց անունները հանել թեկնածուների ցանկից։

Հիշեցնենք, որ ԲԴԽ անդամ, Վերաքննիչ քրեական դատարանի դատավոր Արշակ Վարդանյանը հրաժարականի դիմում էր ներկայացրել, ըստ շրջանառվող լուրերի․ իշխանություններին քննադատող գրառման արտահոսքի պատճառով։ Որպես ԲԴԽ անդամի թեկնածու առաջադրվել էր Վերաքննիչ քրեական դատարանի դատավոր Վազգեն Ռշտունին, ում բարեվարքությունը ԿԿՀ-ն դրական էր գնահատել, սակայն մարտի 28-ին՝ դատավորների ընդհանուր ժողովից առաջ դատավորը հայտարարություն տարածեց՝ թեկնածությունից հրաժարվելու մասին։

«Ինձ համար մեծագույն պատիվ կլիներ դատավորներին տվյալ մարմնում ներկայացնելը, սակայն նժարին դրված էին իմ անձի հետ առնչություն չունեցող հարցեր, որոնք իմ գնահատմամբ ավելի կարեվոր են, քան Բարձրագույն դատական խորհրդի անդամ դառնալը. հակառակ մոտեցումը կարող էր գնահատվել եսասիրական»,- նշել էր Վազգեն Ռշտունին ու ավելացրել, որ վերջին օրերին տեղի են ունեցել որոշակի իրադարձություններ, որոնցով պայմանավորված դժվարին որոշում եմ կայացրել այս պահին չհավակնել Բարձրագույն դատական խորհրդի դատավոր անդամի թափուր տեղին։ Նշենք, որ դատավոր Ռուբիկ Մխիթարյանն էլ ավելի վաղ էր հրաժարվել թեկնածությունից՝ նամակագրության հրապարակման շուրջ աղմուկից հետո։

Աղբյուր` Փաստինֆո