«11-ամյա աղջկա ինքնասպանության հիմքում կարող է լինել ծնողներին «պատժելու» ցանկությունը»

Օրեր առաջ՝ մարտի 11-ին, Արմավիրի մարզի Այգեշատ համայնքում 11-ամյա աղջկա` առաստաղից կախվելու միջոցով ինքնասպանության դեպքը, թերևս, որևէ մեկին անտարբեր չթողեց: Աղջնակի ինքնասպանության դրդապատճառների մասին հստակ որևէ բան հայտնի չէ: Վարկածներից մեկի համաձայն՝ աղջիկն այդ քայլին է գնացել ֆիլմի ազդեցության ներքո:

Հոգեբան Սամվել Խուդոյանի կարծիքով՝ այդ քայլի կարող են գնալ` ամենատարբեր դրդապաճառներից ելնելով: «Կարող է, ասենք, սիրո հողի վրա, ծնողներին ինչ-որ կերպ «պատժելու» համար, հնարավոր է՝ չեն ուզում, բայց հանկարծ ստացվում է: Պատժելու պահը մեկ էլ ստացվում է, իրենք չեն ուզում, բայց ստացվում է: Այսինքն՝ դեմոնստրատիվ սպանություն է սա դառնում»,- նշեց հոգեբանը:

Քայքայիչ պաշտամունքներից տուժածների օգնության և վերականգնողական կենտրոնի ղեկավար Ալեքսանդր Ամարյանի բնորոշմամբ էլ՝ ինքնասպանության մի տեսակ էլ կա, որի հիմքում սպանություն է՝ քողարկված ինքնասպանության տակ: Ամարյանն այս տեսակի սպանության վառ օրինակ դիտարկեց Վազգեն Սարգսյանի անվան ռազմական ինստիտուտում տեղի ունեցած դեպքը:

Yerkir.am-ի հարցին, թե ի՞նչն է դրդել աղջնակին ինքնասպանության գործել, և հավանակա՞ն է այն վարկածը, որ աղջիկը ինքնասպանություն է գործել ֆիլմի ազդեցության տակ, Խուդոյանը և Ամարյանը միանշանակ պատասխան չտվեցին: