Էրդողանի կուսակիցը Ասադին անվանել է «հայապաշտպան ստոր»

Թուրքիայի Ազգային մեծ ժողովի Սահմանադրական հանձնաժողովի նախագահ և իշխող «Արդարություն և զարգացում» կուսակցության` Ստամբուլից պատգամավոր Բուրհան Քուզուն քննադատել է ազգայնամոլների առաջնորդ Դողու Փերինչեքին և հայատյաց հայտարարություն արել:

Ըստ Demokrathaber-ի՝ Քուզուն Twitter-յան իր միկրոբլոգում գրել է.

«Հայրենիք» կուսակցության նախագահ Դողու Փերինչեքը Սիրիա է այցելել: Առանց ամաչելու, անհարմար զգալու այցելել է Ասադի նման ոճրագործին: Ամոթանք եմ տալիս նրան: Միայն իշխանության դեմ դուրս գալու համար նման քայլի ինչպե՞ս կարելի է դիմել: Դողու Փերինչեքը մի կողմից դեմ է հայկական պնդումներին, մյուս կողմից էլ Ասադի նման հայապաշտպան ստորի է այցելում»:

Քուզուի այս ռասիստական հայտարարությունը մեծ դժգոհություն է առաջացրել համացանցում: