Թուրքիայի նախագահի նստավայրը կառուցած հայ ճարտարապետի գերեզմանաքարը՝ շինհրապարակում նետված

Թուրքիայի նախագահի նախկին նստավայրի, իսկ ավելի վաղ` օսմանյան սուլթանների Դոլմաբահչե պալատի ճարտարապետ Կարապետ Պալյանի կորած գերեզմանաքարը հայտնաբերվել է Ստամբուլի քաղաքապետարանին պատկանող շինհրապարակում. ահազանգում է «Ակօս»-ը:

«Ինչպես գիտեք, Ստամբուլի կարևոր կառույցներից շատերի՝ Դոլմաբահչե պալատի, Գյումուշսույու զինվորական հիվանդանոցի, Դոլմաբահչե Վալիդե սուլթան մզկիթի շինությունները պատկանում են Պալյանների ընտանիքին: Ճարտարապետ Կարապետ Պալյանի կորած գերեզմանաքարը հայտնաբերվել է Քարթալ փողոցում` Ստամբուլի քաղաքապետարանի կողմից օգտագործվող շինհրապարակում: Բացի դրանից` նույն տարածքում հայտնաբերվել են շատ այլ գերեզմանաքարեր, որոնց վրա փորագրված հայերեն գրություններն ու մակագրությունները դժվար ընթեռնելի են դարձել»,- գրում է «Ակօս»-ը:

«Ակօս»-ի փոխանցմամբ՝ Ստամբուլի քաղաքապետարանի աշխատակիցները անպատասխան են թողել Պալյանի գերեզմանաքարի մասին իրենց ուղղած բոլոր հարցերը, ասելով, որ «այդ մասին կուսումնասիրեն»:

Հաշվի առնելով բոլոր հին հայկական եկեղեցիները, որոնք այժմ թուրքերն օգտագործում են որպես ախոռ, այնքան էլ զարմանալի չէ, որ հայ ճարտարապետի գերեզմանաքարը այսքան տարի անց հայտնաբերվում է Ստամբուլի քաղաքապետարանին պատկանող ինչ-որ շինհրապարակում նետված: