Ռուս պատգամավորները փոքրիկ Սերյոժայի հուղարկավորությանը մասնակցելու ցանկություն են հայտնել

ՀՀԿ խմբակցությունը Սերյոժա Ավետիսյանի հոգեհանգստի արարողությանը մասնակցելու համար կձևավորի  պատվիրակություն: Այս մասին Yerkir.am-ի հետ զրույցում ասաց ԱԺ ՀՀԿ խմբակցության ղեկավար Վահրամ Բաղդասարյանը:

«Հեռախոսազրույց ենք ունեցել ՌԴ Պետդումայի պատգամավորների հետ, որոնք ցանկություն են հայտնել մասնակցել փոքրիկ Սերյոժայի հուղարկավորությանը և ցավակցել նրա հարազատներին ու հայ ժողովրդին»,- հավելեց նա:

Ըստ Բաղդասարյանի` Գյումրիի սպանդի և հետագա իրադարձությունների թեմայով ընդհատված խորհրդարանական լսումները, նախնական պայմանավորվածությամբ, կտեղափոխվեն հինգշաբթի:

«Բնականաբար, խորհրդարանական լսումներից հետո էլ քննարկումներն այդ թեմայով կշարունակվեն ԱԺ-ում, հանձնաժողովներում, ելույթների ժամանակ: Ամբողջ քննության ընթացքում մենք պետք է լինենք հետևողական, որպեսզի հանցագործը պատժվի խստագույնս»,- ասաց նա: