15-ամյա հանդբոլիստի սպանության գործով դատաքննությունը վերսկսվեց

Այսօր Լոռու մարզի ընդհանուր իրավասության դատարանը որոշում կայացրեց վերսկսել 2013-ին Վանաձորում տեղի ունեցած` 15-ամյա հանդբոլիստ Դավիթ Հովակիմյանի աղմկահարույց սպանության գործով դատաքննությունը: Նշենք, որ դատարանն արդեն ավարտել է դատաքննությունը և անցել դատական վիճաբանությունների փուլին:

Նախատեսվում էր, որ այսօր մեղադրական ճառով հանդես կգա մեղադրող դատախազը, սակայն նա միջնորդեց վերսկսել գործի քննությունը, քանի որ այս գործով ևս մեկ վկայի լսելու անհրաժեշտություն կա:

Yerkir.am-ի հետ զրույցում գործով ամբաստանյալ Կարեն Կունգուրցևի պաշտպան Արայիկ Պապիկյանը հայտնեց, որ իրենց համար անհասկանալի է, թե ինչու է մեղադրող կողմը ձգձգում գործի քննությունը: Պաշտպանական կողմը հույս ունի, որ մեղադրող դատախազը կհրաժարվի առաջադրված մեղադրանքից, քանի որ ինչպես նախաքննության, այնպես էլ դատաքննության ընթացքում որևէ կերպ չի հիմնավորվել իր պաշտպանյալի մեղավորությունը: Նշենք, որ Կունգուրցևին մեղադրանք է առաջադրված ՀՀ ՔՕ 34-104-րդ հոդվածի 1-ին մասի (սպանության փորձ) հատկանիշներով:

Համաձայն մեղադրական եզրակացության՝ Կարեն Կունգուրցևը 2013թ. հոկտեմբերի 12-ին` ժամը 18-ի սահմաններում, կենցաղային հողի վրա վիճաբանել և ապօրինաբար կյանքից զրկելու` սպանելու դիտավորությամբ դանակով մեկ անգամ հարվածել է Դավիթ Հովակիմյանին` կրծքավանդակի ձախ կեսի շրջանում` նրան պատճառելով մարմնական վնասվածքներ, սակայն Հովակիմյանի ընկերների կողմից օգնության հասնելուց հետո Կ. Կունգուրցևը դիմել է փախուստի: Դեպքից անմիջապես հետո Դ. Հովակիմյանը տեղափոխվել է «Վանաձոր ԲԿ» ՓԲԸ, որտեղ ժամը 21:35-ին մահացել է:

Լուսանկարում՝ Կարեն Կունգուրցևը