Մրցավարությունը, մեղմ ասած, միակողմանի էր. Վարդերես Սամուրղաշեւ

Արդեն տեղեկացրել ենք, որ Իրանի Աբադան քաղաքում կայացած հունահռոմեական ոճի ըմբշամարտի ակումբային անդրանիկ առաջնությունում Երևանի «Դինամո» թիմին չհաջողվեց մրցանակային տեղ գրավել: Իսկ ահա Ռուսաստանը ներկայացնող Դոնի Ռոստովի Սամուրղաշև եղբայրներ ակումբի թիմը գրավեց երկրորդ տեղ՝ եզրափակիչում զիջելով Իրանի առաջին թիմին: Հայաստանի ըմբշամարտի ֆեդերացիայի պաշտոնական կայքը զրուցել է  Աթենքի օլիմպիական օլիմպիական խաղերի չեմպիոն, աշխարհի ու Եվրոպայի առաջնությունների բազմակի հաղթող Վարդերես Սամուրղաշևի հետ, ով ռուսական թիմի պատվիրակության ղեկավարն էր:

-Վարդերե'ս, կարծե՞ս այնքան էլ գոհ չեք ձեր թիմի արդյունքից:

-Ռուսաստանը միշտ պայքարում է առաջին տեղի համար, ուստի արդյունքից գոհ չեմ, բայց տղաների ցուցադրած ըմբշամարտից շատ գոհ եմ:

-Եզրափակիչում սպասվում էր, որ 75 կգ քաշային կարգում հանդես կգա Չիխերկինը, սակայն նա գորգ չելավ: 

-Չիխերկինին խնայեցինք, այդպես էր պետք:

-Հետևելով ըմբիշների մրցելույթներին՝ հաճախ չէիք կարողանում զսպել Ձեր հույզերը, երբեմն էլ դժգոհություն էիք արտահայտում մրցավարների կայացրած որոշումներին:

-Մրցավարությունը, մեղմ ասած, միակողմանի էր, իսկ հույզերի առումով անզուսպ էի, որովհետև ցավում եմ մեր բոլոր ըմբիշների համար: Նրանց գոտեմարտերի ժամանակ ես ինձ գորգում եմ պատկերացնում և ուզում եմ նրանց փոխարեն հնարք կատարել:

 -Մրցավարությունից դժգոհ եք, բայց ամեն դեպքում Իրանի թիմն էլ շատ ուժեղ էր:

 -Չեմ վիճում, սակայն կարելի էր հաղթել: 

 -Մրցումներից ստացած ընդհանուր տպավորություններից ի՞նչ կասեք:

-Շատ ապրեն իրանցիները, հիանալի էին կազմակերպել: Ընդհանրապես, Իրանում ըմբշամարտի մրցումները անցնում են շատ բարձր մակարդակով: