Եկել եմ, որ թռնեմ, ասում են՝ խի, դու տեղյակ չե՞ս, որ «Էյր Արմենիա»-ն փակվել ա. ուղևորները խնդիրների առջև են կանգնած

Ամեն անգամ, երբ հայկական ավիաընկերությունները դադարեցնում են չվերթերը, հայտնվում են տոմսը ձեռքներին մնացած ուղևորներ, որոնք լուրջ խնդիրների առաջ են կանգնում: Նման մի դեպքի ականատես եղանք այսօր «Զվարթնոց» օդանավակայանում:

Ֆրանսիայում բնակվող Ստյոպա Ներսիսյանը Ֆրանսիայում «Էյր Արմենիա»-ի գրասենյակից գնել էր Փարիզ-Երևան-Փարիզ ավիատոմս: Բարեհաջող հասնելով Երևան՝ նա ակնկալում էր նույն հաջողությամբ վերադառնալ Փարիզ, սակայն նրա՝ Երևանում գտնվելու ընթացքում «Էյր Արմենիա»-ն հասցրեց դադարեցնել չվերթերը և այդ մասին հայտարարությամբ հանդես եկավ:

«Էկել եմ, որ թռնեմ, ասում են` խի, դու տեղյակ չե՞ս, որ «Էյր Արմենիա»-ն փակվել ա: Ա'յ ախպեր, ես եկել եմ իմ բարեկամներին տենա՞մ, թե՞ լուրերին հետևեմ: Վաղը պետք է գնայի, հասնեի գործի, բայց էլ չեմ կարող, հիմա ստիպված հետդարձի նոր տոմս եմ գնել, Կիևով պետք է գնամ, հասնեմ Ֆրանսիա: Դուք էլ եք տեսնում՝ իրենց գրասենյակը չի աշխատում: Ես տոմսը գնել էի ուղիղ չվերթով, իսկ հիմա պերեսադկով պետք է գնամ: Նախ` չգիտեմ` իմ գումարը կվերադարձնե՞ն, թե՞ չէ, երկրորդն էլ ես Կիևով թռնելու համար հավելյալ գումար եմ վճարել՝ չհաշված անհարմարությունները»,- Yerkir.am-ի հետ զրույցում հայտարարեց Ներսիսյանը:

Զրուցեցինք նաև «Էյր Արմենիա» ընկերության մարքեթինգ-մենեջեր Սիրական Համբարձումյանի հետ: Նա հայտնեց, որ բոլոր այն ուղևորները, որոնք տոմսի կամ գումարի վերադարձի խնդիր ունեն, պետք է դիմեն ընկերության կենտրոնական գրասենյակ:

«Եթե ուզում են գումարը հետ ստանալ, պետք է տոմսը վերադարձնեն այնտեղ, որտեղից գնել են, այս դեպքում` Փարիզի մեր մասնաճյուղ: Իսկ եթե ուզում են տոմսը փոխել, ապա պետք է այցելեն մեր կենտրոնական գրասենյակ, և մեր մասնագետների հետ խորհրդակցության ընթացքում նրանց կառաջարկվի հարմար լուծում»,- ասաց Համբարձումյանը:

Ճիշտ է, ընկերության ներկայացուցիչները նշում են, որ իրենք բազմիցս հայտարարել են այդ մասին, բայց տրամաբանությունը հուշում է, որ ընկերության աշխատակիցները գոնե պետք է զանգահարեին իրենց ուղևորներին և անձամբ տեղեկացնեին խնդրի մասին, նաեւ` լուծման հնարավոր տարբերակներ առաջարկեին: Ի վերջո, մարդիկ հնարավոր է չհետեւեն մամուլին եւ անհարմար իրավիճակների մեջ հայտնվեն:

Հայկական ավիաընկերությունների «կործանված ճակատագրերին» կարող եք ծանոթանալ՝ այստեղ: