Անհասկանալի է, թե ինչու է այն տեղադրվել. ՌԴ ԱԳՆ-ն՝ Նժդեհի արձանի մասին

ՌԴ ԱԳՆ ներկայացուցիչ Մարիա Զախարովան, այսօր  ճեպազրույցի ժամանակ անդրադառնալով Երեւանում Գարեգին Նժդեհի արձանի տեղադրմանը, հայտարարել է, թե Մոսկվայի համար անհասկանալի է՝ ինչու է Երեւանում տեղադրվել Վերմախտի Հայկական լեգեոնի ստեղծողներից Գարեգին Նժդեհի արձանը:

«Մեր վերաբերմունքը Հայրենական մեծ պատերազմին բոլորը լավ գիտեն: Մեր վերաբերմունքը նացիզմի, նեոնացիզմի ցանկացած դրսևորումների հերոսացմանը նույնպես բոլորը լավ գիտեն: Եւ դա ամրագրված է միջազգային փաստաթղթերում: Մեզ համար անհասկանալի է, թե ինչու է տեղադրվել տվյալ արձանը, չէ՞ որ մենք բոլորս գիտենք հայ ազգի անմահ հերոսության մասին», - ասել է Զախարովան:

Միաժամանակ նա շեշտել է, որ Մոսկվայի համար այդուհանդերձ որոշիչ է  Երևանի վերաբերմունքը Հայրենական պատերազմում հաղթանակի հիշատակի պահպանմանը և Մայիսի 9-ի տոնին: Զախարովան ընդգծել է, որ Հայաստանը ՄԱԿ ռասսիզմի, նացիզմի ու նեոնացիզմի դեմ պայքարի կոչ անող բանաձևի համահեղինակն է: