Չպետք է հուզվենք ՌԴ-ի` Նժդեհի արձանի վերաբերյալ արձագանքից. ՀԳՄ նախագահ

Ռուսաստանի ԱԳՆ-ի արձագանքը Նժդեհի արձանի մասին միայն ու միայն քաղաքական ենթատեքստ էր հետապնդում. լրագրողների հետ զրույցում կարծիք հայտնեց ՀԳՄ նախագահ Էդվարդ Միլիտոնյանը:

Ըստ նրա` խնդիրն այն է, որ մենք մեր հերոսներին չենք կարողանում հավուր պատշաճի ներկայացնել և աշխարհին ասել, որ Նժդեհը մեզ համար հերոս էր մինչև Երկրորդ համաշխարհայինի սկիզբը:

«Մենք պահանջում ենք, որ ուրիշները ճանաչեն մեզ, բայց մենք մեր հերոսներին չենք կարողանում աշխարհին ներկայացնել, նախ` մենք մեզ պետք է ճանաչենք: Ռուսաստանի` նման արձագանքից շատ չպետք է հուզվենք և շատ սառը պետք է պատասխանենք նրանց: Մենք քաղաքական դաշտում շատ ծանր ենք մտածում և դժվար ենք դիրքային փոփոխություններ անում, դրա համար էլ ամեն ինչից հուզվում ենք»,- ասաց Միլիտոնյանը` հավելելով, որ, այնուամենայնիվ, չի կարծում, որ ՌԴ-ի քայլը հակահայկական դրսևորում է:

Ըստ նրա` ռուսներն այսօր այնքան արձաններ ունեն, որոնք ուղղակի չպետք է լինեին. օրինակ` Կրեմլի հրապարակում տեղադրված` Լենինի արձանը: ՀԳՄ նախագահի հավաստմամբ` Լենինն ինքն իր կտակում չի նշել, որ ուզում է «գետնի երեսին» մնալ:

«Բայց մենք չպետք է ռուսներից պահանջենք, թե` դե որ այդպես է, դուք էլ ձեր այսինչ հերոսի արձանը հանեք: Ոչ, մենք չպետք է նման քայլերի դիմենք: Ռուսաստանի քայլը քաղաքական մանր քայլ էր ուղղակի»,- խոսքն ամփոփեց Միլիտոնյանը: