Պատգամ լրագրողներին՝ հարգել պատգամավորներին

ԱԺ-ում այսօր մեկնարկել է հերթական քառօրյան: Հավատարմագրված լրագրողներին անակնկալ էր սպասում: ԱԺ հասարակայնության հետ կապերի եւ լրատվության վարչության պետ Արսեն Բաբայանի մտքի գոհարը լրագրողներին ե'ւ զարմացրեց, ե'ւ զայրացրեց: Նա հիշեցրել է, թե ինչպես պետք է լրագրողը վարվի պատգամավորի հետ: Թուղթն էլ փակցրել է ԱԺ-ում, որում, մասնավորապես, ասված է`

«ՀՀ Ազգային ժողովում  հավատարմագրված լրագրողը  պարտավոր է՝

մասնագիտական գործողության իրականացման ընթացքում հարգել Ազգային ժողովի  պատգամավորների և Աշխատակազմի աշխատակիցների օրինական շահերը, պատիվն ու արժանապատվությունը.

·  Իր մասնագիտական գործունեությամբ կամ այլ գործողություններով  չխոչընդոտել Ազգային ժողովի  պատգամավորների, Ազգային ժողովի նիստերին  ներկա գտնվող (մասնակցող) անձանց և Աշխատակազմի աշխատակիցների ծառայողական պարտականությունների կատարմանը,

·  Ազգային ժողովի տարածք մուտք գործելիս ներկայացնել հավատամագիրը, կրել այն Ազգային ժողովի  վարչական տարածքում գտնվելու ընթացքում,  ինչպես նաև ենթարկվել «Հայաստանի Հանրապետության Ազգային ժողովի վարչական շենքի և  պահպանության հրահանգի» պահանջներին,

· Կատարել օրենքով լրագրողի համար սահմանված  պարտականությունները՝ հաշվի առնելով Ազգային ժողովի և Աշխատակազմի գործունեության առանձնահատկություններից բխող պահանջներ:

Լրագրողի հավատարմագրումը վաղաժամկետ դադարեցվում է, եթե նա խախտել է ՀՀ  Ազգային ժողովում լրագրողների հավատարմագրման կարգը»:

Այս տեքստը նոր չէ, զավեշտալին այն է, որ այն փակցրել են ԱԺ-ում: Գուցե լրագրողներին դասեր տալուց առաջ արժեր կարգի հրավիրել նախեւառաջ երկրի օրենսդիրներին... Նրանց պահվածքի եւ վարքի մասին մեկ անգամ չէ, որ գրել են լրագրողները: