Աշխարհի ոչ մի երկրում դեղերի դրոշմապիտակների հաշվառում չի կատարվում. Աղվան Վարդանյան

Այսօր` կառավարության հետ հարցուպատասխանի ժամանակ, ԱԺ ՀՅԴ խմբակցության պատգամավոր Աղվան Վարդանյանը հարց ուղղեց առողջապահության նախարարին: Նա նշեց, որ, «Առևտրի և ծառայությունների մասին օրենքում» կատարված փոփոխությունների համաձայն, նոյեմբերի 1-ից պետք է կատարվի դեղերի պարտադիր դրոշմավորում:

Պատգամավորի խոսքով` ոլորտի կարևոր ընկերություններից մեկի` «Վագա ֆարմ»-ի տնօրենը ամսագրերից մեկում հոդված է հրապարակել, որում փորձում է ապացուցել, որ օրենքի այդ դրույթը չի կարող արդյունավետ լինել, որովհետև ոլորտում ստվերը բավական փոքր է ու չի կրճատվելու:

«Ապրանքների քանակը միանգամից ֆիքսվում է սահմանին` ֆիննախի ու առողջապահության նախարարության կողմից, այսինքն` լրացուցիչ հաշվառման անհրաժեշտություն չկա: Պետությունը 1 մլն 300 հազար դրամի լրացուցիչ ծախս է կատարելու դրոշմապիտակների վճարը փոխհատուցելիս: Արդյունքում` անպտուղ աշխատանք է արվելու, բյուջե լրացուցիչ մուտքեր չեն լինելու, տուժելու են քաղաքացիները»,- ասաց Աղվան Վարդանյանը` հավելելով, որ աշխարհի ոչ մի երկրում դեղերի դրոշմապիտակների հաշվառում չի կատարվում: Պատգամավորը հարցրեց, թե արդյո՞ք այդ հարցի շուրջ քննարկումներ եղել են կառավարությունում:

Առողջապահության նախարար Արմեն Մուրադյանը նշեց, որ բարձրացված հարցը մի քանի անգամ քննարկվել է առողջապահության նախարարությունում: «Կառավարությունում ևս քննարկումներ եղել են բարձրացված հարցի շուրջ և հանգեցրել են այն եզրակացության, որ շուկայում առկա անգամ փոքր քանակության կեղծ դեղերը կամ չգրանցված դեղերը կարիք ունեն պարտադիր հսկողության: Եվ այդ առումով` յուրաքանչյուր դեղամիջոց, որը ստեղծվում է ՀՀ-ում կամ ներմուծվում է, վերահսկվում է»,- ասաց նա:

Նախարարի խոսքով` 43 մլն (փաթեթ) դեղ 55 մլն միավոր քանակությամբ, ամբողջովին հաշվառվել է, և դա բացարձակ չի ազդել դեղի գնի վրա: Նա նշեց նաև, որ կեղծ դեղորայքի ներմուծման կանխարգելումը յուրաքանչյուր պետության կարևորագույն խնդիրներից մեկն է, և մեր երկիրը ևս ընտրել է այս ճանապարհը: