Սեդրակյանի «տեխնիկական կոճակը» չի աշխատում. խառնաշփոթ` քվեարկության ժամանակ

Այսօր ԱԺ նիստում քվեարկության դրվեց ԱԺ պատգամավորներ Միքայել Մելքումյանի, Նաիրա Զոհրաբյանի, Էլինար Վարդանյանի, Վահե Էնֆիաջյանի և Վահան Բաբայանի ներկայացրած` «Արտոնագրային վճարների մասին» ՀՀ օրենքում լրացումներ կատարելու մասին օրենքի նախագիծը: Կողմ էր քվեարկել 47 պատգամավոր, դեմ` 42-ը:

Պատգամավորների շրջանում խառնաշփոթ սկսվեց, որովհետև շատերը ճիշտ չէին քվեարկել:

ԱԺ փոխնախագահ Էդուարդ Շարմազանովը նշեց, որ պատգամավորների մի մասը սխալվել է, և հայտարարեց, որ  օրինագիծը կրկին դնում է քվեարկության: ԲՀԿ-ական պատգամավորները ծափահարեցին, իսկ ԱԺ նախագահ Գալուստ Սահակյանը նշեց. «Ես զարմանում եմ` էդքան փոքր հնարավորությունից կարելի՞ է ուրախանալ: Եթե այդպես է` հաճախակի կտանք ձեզ նման հնարավորություն, որ ուրախանաք»:

Էդուարդ Շարմազանովը նշեց. «Նենց չի, որ անցել էր նախագիծը, ո'չ, չէր անցել, ուղղակի, որպեսզի պրոբլեմ չլինի, նորից ենք դնում քվեարկության»:

Վարման կարգով ԱԺ ԲՀԿ պատգամավոր Տիգրան Ուրիխանյանը պահանջեց հիմնավորել կրկնակի քվեարկությունը: Էդուարդ Շարմազանովը հիմնավորեց. «Ձեր խմբակցությունից երկու հոգի են սխալ քվեարկել, մեր խմբակցությունից` վեց հոգի»:

Էլինար Վարդանյանը հարցրեց. «Կարո՞ղ եք հղում անել ԱԺ կանոնակարգին, որ կա «սխալ քվեարկություն» տերմինը»: «Կարող եմ հղում անել, որ պատգամավորները քվեարկությունից հետո ասում են, որ սխալ են քվեարկել»,- ասաց Շարմազանովը:

«Եթե չի աշխատել սարքավորումը, չեն քվեարկել, կարող ենք նորից կազմակերպել քվեարկությունը»,- ասաց ԱԺ նախագահը:

Քվեարկությունը կրկին կազմակերպվեց, եւ ԲՀԿ-ականների օրենքը չընդունվեց:

«Պարոն Սեդրակյանի տեխնիկական կոճակը չի աշխատում»,- ծիծաղը չկարողացավ զսպել Շարմազանովը:

Տիգրան Ուրիխանյանը վարման օրենքով ձայն խնդրեց` ասելով. «Խոսքը գնաց քաղաքակա՞ն, թե՞ տեխնիկական սխալի մասին: Հազիվ մեկ անգամ լավ բան արեցիք, հետո միանգամից չեզոքացրեցիք, մարդիկ փորձառություն ունեն և քվեարկել են հօգուտ ժողովրդի»: