«Ալաշկերտ»-ը ընկերական խաղում հաղթեց թուրքական ակումբին

Երևանի  «Ալաշկերտ»-ը երկրորդ ստուգողական խաղն է անցկացրել Թուրքիայի Բոլու քաղաքում անցկացվող ուսումնամարզական հավաքի շրջանակներում։

Ինչպես տեղեկացնում է ակումբի պաշտոնական կայքը,  մրցակիցը Թուրքիայի Սուպերլիգայի ներկայացուցիչ «Բալիկեսիրսպոր» թիմն էր։

Ալաշկերտցիները գերազանց խաղ են ցուցադրել ողջ 90 րոպեների ընթացքում և մեկական գոլ են խփել յուրաքանչյոր խաղակեսում`  հաղթելով 2:0 հաշվով։ Առաջինը հաջողության է հասել թիմի  լավագույն ռմբարկու Միհրան Մանասյանը, այնուհետև խաղընկերների հաղթանակը դիպուկ հարվածով ամրապնդել է թիմի նորեկ Արամ Բարեղամյանը։

Հուլիսի 21-ին առավոտյան «Ալաշկերտ»-ը կվերադառնա Երևան և մինչ առաջնության մեկնարկը մարզումները կշարունակի «Նաիրի» մարզադաշտում։