Կիսելյովը հիմա էլ որոշել է ուկրաինական ճգնաժամը լուսաբանող կայք բացել

«Ռոսիյա սեգոդնյա» ռուսական լրատվական գործակալությունն այսօր գործարկել է Ուկրաինայի ճգնաժամը լուսաբանող նոր կայք` ukraina.ru-ն: Այս մասն հայտնում է BBC-ն:

Հիշեցնենք, որ լրատվական գործակալության գլխավոր տնօրենը Դմիտրի Կիսելյովն է: Կայքի ղեկավարության մտահղացմամբ` կայքը պետք է ներկայացնի ուկրաինական ճգնաժամի վերաբերյալ տարբեր տեսակետեր:

Անցյալ ձմռանը ստեղծված «Ռոսիյա սեգոդնյա» լրատվական գոծակալության հիմնական ուղղվածությունը Ռուսաստանի պետական քաղաքականության հանրահռչակումն ու քարոզումն է արտերկրում:

Փորձագետները նոր կայքի հայտնվելը բացատրում են նրանով, որ Ռուսաստանի ղեկավարությունը ցանկանում է ուժեղացնել երկրի արտաքին քաղաքականության քարոզումը:

Կայքում նշված է, որ այն վերլուծելու է համաշխարհային ԶԼՄ-ների հրապարակումները, ինչպես նաև հրապարակելու է փորձագետների և հայտնի անձանց կարծիքներ, մեկնաբանություններ` Ուկրաինայի իրադարձությունների վերաբերյալ:

«Անհրաժեշտություն է առաջացել ստեղծել ռեսուրս, որն օբյեկտիվորեն և ժամանակին կլուսաբաներ Ուկրաինայի իրադարձությունները»,- վստահեցրել է կայքի գլխավոր խմբագիր Ալյոնա Բերեզովսկայան: