Կառավարությունը մտադիր չէ կենսաթոշակ արտահանել

Այսօր ԱԺ սոցիալական հարցերի մշտական հանձնաժողովում ԱԺ պատգամավորներ Հակոբ Հակոբյանի, Ռուբեն Հովհաննիսյանի, Վրեժ Մարկոսյանի և Արմեն Մխիթարյանի օրենսդրական նախաձեռնությունը «Պետական կենսաթոշակների մասին» ՀՀ օրենքում փոփոխություններ ու լրացումներ կատարելու մասին մերժվեց կառավարության կողմից:

Մասնավորապես` առաջարկվում էր Հայաստանից դուրս ապրող ՀՀ կենսաթոշակառուներին  չվճարված կենսաթոշակների գումարը վճարել անցած ամբողջ ժամանակահատվածի համար` առանց ժամկետային սահմանափակման: Ներկայումս ժամկետային սահմանափակումը մեկ տարի է: Առաջարկվում է ՀՀ-ում չգտնվող կենսաթոշակառուների կենսաթոշակը վճարել առանց ժամկետային սահմանափակումների:

Սակայն ՀՀ աշխատանքի և սոցիալական հարցերի նախարար Արտեմ Ասատրյանը նշեց, որ կառավարությունը մերժում է պատգամավորների օրենսդրական նախաձեռնությունը, որովհետև օրինագիծն ընդունելու դեպքում էապես կավելանան կենսաթոշակների վճարմանն ուղղված ծախսերը, և 2-3 տարում կենսաթոշակները վճարելու համար պահանջվելու էր միանվագ 25 միլիարդ դրամ կամ տարեկան 12 միլիարդ դրամ:

Արտեմ Ասատրյանը նշեց նաև, որ, կախված  երկրի ֆինանսական հնարավորություններից, աշխարհում տարբեր մեթոդներ կան երկրի սահմաններից դուրս ապրող կենսաթոշակառուների թոշակը վճարելու համար:

«Մենք արդյո՞ք հնարավորություն ունենք կենսաթոշակ վճարել նաև երկրից դուրս: Հարցը հետևյալն է` կենսաթոշակներն արտահանե՞լ, թե՞ ոչ: Կառավարության համար առաջնահերթությունը Հայաստանում մշտապես ապրող կենսաթոշակառուների սպասարկումն է և նրանց կենսամակարդակի բարձրացումը: Կառավարությունը հետագայում կանդրադառնա այս խնդրին, սակայն հիմա այն մերժում է»,- ասաց նախարարը:

ԱԺ սոցիալական հարցերի մշտական հանձնաժողովի նախագահ Հակոբ Հակոբյանը նշեց. «Արդյո՞ք ճիշտ է մեկի հաշվին մյուսին փող տալը, մյուս կողմից էլ` հասկանում եմ, որ տարեկան 12 միլիարդ դրամը կառավարության համար շատ թանկ գումար է»,- ասաց նա: