Ընկած եք սենսացիաների հետեւից. Կճոյանը նախատեց լրագրողներին

ՀՀԿ համագումարն  իր ներկայությամբ այս անգամ եւս պատվել էր Արարատյան հայրապետական թեմի առաջնորդական փոխանորդ Նավասարդ արքեպիսկոպոս Կճոյանը: ՀՀԿ 15-րդ համագումարի մեկնարկից առաջ նա Տերունական աղոթքով օրհնեց համագումարը, իսկ արդեն համագումարի ընդմիջման ընթացքում խոսեց լրագրողների հետ:

Անդրադառնալով իր եւ Հովիկ Աբրահամյանի հարաբերություներին' Կճոյանն ասաց. «Հովիկ Աբրահամյանը, որդին` Արգամը, Մխչյան գյուղում վերանորոգել են Սբ Հովանես Մկրտիչ եկեղեցին. Ի՞նչ պետք է ես ասեմ նրա մասին' միայն դրականը»:

Օֆշորային սկանդալի մասին հարցերը փոքր-ինչ բարկացրեցին արքեպիսկոպոսին: Yerkir.am-ի դիտարկմանը, թե շուտով Վրաստանից Հայաստանին է արտահանձնվելու Աշոտ Սուքիասյանը' իր սանիկը, արդյո՞ք հետաքրքրվա՞ծ է նրանով, ինչ-որ ձեւերով կապ պահպանո՞ւմ է սանիկի հետ, արքեպիսկոպոսը պատասխանեց. «Ինչպե՞ս կարող եմ ես իր հետ կապ ունենալ. Ինչո՞ւ պետք է գործի մանրամասներով հետաքրքրվեմ»:

Մեր դիտարկմանը'  մի՞թե չի հետաքրքրվում սանիկի ճակատագրով, հակադարձեց. «Ինձ բոլորի ճակատագիրն է հետաքրքրում»:

Նա զրույցի ընթացքում նախատեց լրագրողներին` ասելով, թե լրագրողները ճիշտը չեն ուզում իմանալ, նաեւ' լսել, ընկած են սենսացիաների հետեւից: Հարցին, թե, ի վերջո, իր անունն ո՞վ կապեց օֆշորային սկանդալի հետ, եթե ինքն անմեղ է, Կճոյանը պատասխանեց. «Ձեզ նման մեկը»: