Հովիկ Աբրահամյանն ինձ ասել է, որ Վարդան Այվազյանն էլ լուրջ շահեր ունի. Նիկոլ Փաշինյան

Արմավիրի մարզի գյուղացիները դարձյալ ոռոգման ջրի պակասի խնդրի առաջ են կանգնել. ԱԺ-ում հայտարարեց ԲՀԿ-ական պատգամավոր Լյովա Խաչատրյանը եւ կառավարությանն առաջարկեց Հյուսիս-հարավ ավտոճանապարհի գումարներից ուղղել ջրամբարների կառուցմանը, որովհետև ջրի հարցը շատ ավելի կարևոր է, քան այդ ճանապարհի կառուցումը:

Լյովա Խաչատրյանը նշեց, որ պետք է խորհրդարանական հանձնաժողով ստեղծել, լուրջ ուսումնասիրություններ անել և պարզել, թե, օրինակ, ինչո՞ւ Ապարանի ջրամբար վերջին չորս տարիներին ջուր չի լցվում:

ՀԱԿ խմբակցության պատգամավոր Ստեփան Դեմիրճյանը իր ելույթում հարց բարձրացրեց, թե ինչո՞ւ չեն պատժվում Արարատյան դաշտավայրի ջրային պաշարներն անխնա օգտագործողները: Նա նշեց, որ անընդունելի է համարում կառավարության` Սեւանա լճից ջրի լրացուցիչ քանակ վերցնելու նախագիծը, որովհետև լուրջ խնդիրներ են առաջանալու: Ըստ Դեմիրճյանի՝ գիտնականները եկել են այն եզրահանգմանը, որ տարեկան 170 մլն խմ-ից ավելի ջուր բաց թողնելու դեպքում լիճը կճահճանա: Նա նշեց, որ կառավարությունը հիմնավորում է դա Արարատյան դաշտավայրի անապատացումը կանխելու հարցով: Այդ հարցը լուրջ հարց է` 303 արտեզյան հորերից 120-ը չորացել են, գրունտային ջրերի մակարդակն իջել է, ավեի քան 30 համայնքներ մնացել են առանց խմելու և ոռոգման ջրի: Ըստ Դեմիրճյանի՝ այս ծանր վիճակն առաջացել է Արարատյան դաշտավայրի արտեզյան ջրերի` ձկնաբուծարաններում անխնա օգտագործման հետեւանքով: Առանց հաշվարկի ստեղծվել են ձկնաբուծարաններ, որոնք օգտագործում են ջրի թույլատրելի ծախսի ավելի քան 60 տոկոսը: Բավարար վերահսկողություն չի իրականացվել ջրային ռեսուրսների նկատմամբ, իսկ մեղավորները չեն պատժվել:

ՀԱԿ պատգամավոր Լյուդմիլա Սարգսյանը խնդրի առաջացման պատճառներից մեկը համարեց, ձկնարդյունաբերությամբ պայմանավորված, արտեզյան ավազանից անթույատրելի քանակությամբ ջուր բաց թողնելը:

Իսկ ՀԱԿ պատգամավոր Նիկոլ Փաշինյանը նույնպես խիստ քննադատության ենթարկեց իշխանություններին` նրանց համարելով միակ մեղավորը: Նրա խոսքով` 8000 հա տարածություն մնացել է առանց ջրի: «Վարդան Այվազյանն ասում է` գյուղացին ջուր չունի: Բա ո՞վ է մեղավորը, որ այսօր գյուղացին հայտնվել է անջուր հողերի առաջ: Սերժ Սարգսյանն ասում է` բա թողենք, որ Արարատյան դաշտավայրը չորանա՞: Բայց իր ղեկավարած իշխանությունն է մեղավոր, որ իրականացրել է ազգային հարստության թալան: Նույնն է, թե բանկի սեփականատիրոջն ասե`ՙ միլիարդավոր գումարներ են գողացել բանկից, իսկ նա ասի` դե ոչինչ, դոշակի տակի պահած փողերից տարեք, դրեք տեղը»,- ասաց պատգամավորը:

Նրա համոզմամբ` նախ պետք է լինի իրավական գնահատական` պարզելու, թե ոնց է տեղի ունեցել ջրի գողացումը: Ըստ Փաշինյանի` իրավական իմաստով դա նույնպես ազգային հարստության թալան է, որովհետև, ըստ Սահմանադրության, պետությունն է պարտավոր ապահովել ազգային հարստության պահպանումը: «Իսկ մենք փաստ ունենք, որ ջուրը հոսել է, գողացվել է անհայտ ձևով: Մինչև ջրի դեֆիցիտը լրացնելը, պետք է իրավական գնահատական տանք, մեղավորներին պատասխանատվության ենթարկենք, հակառակ դեպքում` նույն տրամաբանությամբ Սևանը կչորանա մի քանի տարի անց»,- ասաց նա:

Փաշինյանը հավելեց նաև, որ շրջանառվում են շատ ազդեցիկ պաշտոնյաների անուններ, որոնք ներգրավված են ձկնաբուծության ոլորտում` Սամվել Ալեքսանյան, Հովիկ Աբրահամյան, Գագիկ Ծառուկյան... «Ի դեպ, Հովիկ Աբրահամյանն ինձ ասել է, որ ձկնարդյունաբերության մեջ Վարդան Այվազյանն էլ լուրջ շահեր ունի: Հիմա պարոն Այվազյանը գյուղացիների դա՞րդն է լացում, թե՞ իր արդյունաբերության և իր շահերի դարդն է լացում: Հանրությանը պետք է հստակ պատասխան տրվի թե հիշյալ ազդեցիկ մարդիկ ինչքանո՞վ են այդ խնդրում մեղավոր, թե ինչո՞ւ պատասխանատուները չեն կանխել ջրի գողացումը»,- ասաց պատգամավորը: