Ի՞նչ էին «մասնավոր տարածքում» երկու ժամից ավելի խոսում երեք կուսակցությունների ղեկավարները

«Ժառանգություն»  կուսակցության, ՀԱԿ եւ ԲՀԿ առաջնորդների միջև հանդիպումը շատ լավ, բովանդակային հանդիպում է եղել, որը կարևոր է հետագա համագործակցության համար: Այն տևել է երկու ժամից ավելի` մասնավոր տարածքում: Այս մասին Yerkir.am-ի հետ զրույցում ասաց «Ժառանգություն» կուսակցության փոխնախագահ Արմեն Մարտիրոսյանը:

Հարցին, թե հանդիպման ընթացքում ի՞նչ հարցեր են քննարկվել, նա չցանկացավ պատասխանել՝  ասելով, որ երեք ուժերի համատեղ հայտարարության մեջ ամեն ինչ ասված է: Հիշեցնենք, որ այդ հայտարարության մեջ ասված էր ընդամենը, որ հանդիպման ընթացքում քննարկվել են երկրում ստեղծված նոր քաղաքական իրավիճակում համատեղ քաղաքական օրակարգի և գործողությունների ծրագրի ձևավորման հարցեր: 

Արդյո՞ք այդ հանդիպումը նշանակում է, որ  իրականություն է դարձել Րաֆֆի Հովհաննիսյանի՝ կուսակցությունների միջև հետագա համագործակցության կարևոր պայմանը, և «Ժառանգությունը» դուրս չի գա համագործակցության ֆորմատից: Արմեն Մարտիրոսյանն այսպես պատասխանեց այդ հարցին. «Իսկ դուք ա՞յլ հայտարարություն եք լսել»:

Հարցին՝ ի՞նչ կարծիք ունի «Ժառանգություն» կուսակցությունը սահմանադրական բարեփոխումների վերաբերյալ, մեր զրուցակիցը պատասխանեց, որ դեռևս քննարկումներ են գնում, առաջիկայում կհայտնեն հստակ դիրքորոշումը սահմանադրական բարեփոխումների վերաբերյալ: