Ղալաթ կանես, այ.... բնապահպանը՝ իր ականջները կտրել սպառնացող բնապահպանության նախարարին

Բնապահպան Ապրես Զոհրաբյանն իր ֆեյսբուքյան էջում հակադարձել է բնապահպանության նախարար Արամ Հարությունյանին, ով այսօր «Մարիոթ» հյուրանոցում ակտիվիստների հետ վեճի ընթացքում ասել էր. «Ականջներդ կկտրեմ, այ լակոտ»:

Ապրես Զոհրաբյանը գրել է. «Այսօր «Մարիոթ» հյուրանոցում մասնակցում էի ԱՄՆ-ը, Բրիտանական, Գերմանական և Կանադական դեսպանատների, Համաշխարհային Բանկի և ՀՀ Կառավարության համատեղ համաժողովին, որը ուներ «Պատասխանատու Հանքարդյունաբերություն»  անվանումը:Համաժողովին իր մասնակցություն էր բերել նաև ԲՆ Արամ Հարությունյանը:

Մասնակիցների կողմից նրա ուղղությամբ հնչում էին գնահատականներ, հարցեր, առաջարկներ կապված իր նախարարության գործունեության հետ:Ես էլ այդ պահին տվեցի նախարարության իմ գնահատականը մեջբերում անելով ( նշելով աղբուրը) ԲՆ-ի հանրային կապերի երկար տարիների նախկին պատասխանատու և այդ նախարարությունը ուղնուծուծով ճանաչող Արծրուն Պեպանյանին, որը մի առիթով ասել էր թե «այդ նախարարությունը գերեզմանոց է»:

Դա առաջացրեց Արամ Հարությունյանի հակազդեցությունը ինչը աղմուկի պատճառով ես չլսեցի:Հետագայում լրագրողների հարցումներից հետո ուսումնասիրեցի այդ պահը արձանագրած տեսանյութը, որից պարզ դարձավ, որ Արամ Հարությունյանը սպառնում է «կտրել իմ ականջները»  և անվանարկում է ինձ «լակոտ»: Բազմիցս շեշտել ենք, որ գոյություն ունի անհամապատասխանություն Արամ Հարությունյանի բարոյաիմացական,մասնագիտական որակների և իր զբաղեցրած պաշտոնի միջև:

Քաղաքացիների հետ շփվելու իր այս ոճը կրկին գալիս է հաստատելու մեր իրավացիությունը:Համապատասխան եզրակացությունը թողելով նրան այդ պատասխանատու դիրքը վստահած մարդկանց ես հարկ եմ համարում ուշացումով արձագանքել Արամ Հարությունյանի սպառնալիքին և անվանարկմանը:Այսպիսով `.«Ղալաթ (բառը փոխառված է կառավարության մեկ այլ անդամ Հրայր Թովմասյանի բառամթերքից) կանես այ... (հասկանալ խորհրդարանում Արմեն Ռոստոմյանի Մալխասյանի բառարանից մեջբերած բառը)»: