Մետրոպոլիտենի աշխատակցին ազատել են պարտադիր վճարի դեմ բողոքելու համար

Այսօր Երևանի մետրոպոլիտենի երեք աշխատակիցներ ազատվել են աշխատանքից: Նրանից մեկի կինը, ով չցանկացավ ներկայանալ, Yerkir.am-ի հետ զրույցում ասաց, որ իր ամուսնու համար անսպասելի է եղել աշխատանքից ազատվելը, և նա դա կապում է պարտադիր կուտակային պահումների դեմ բողոքի հետ:

Նշենք, որ մի քանի օր առաջ մետրոպոլիտենի մի քանի տասնյակ աշխատակիցներ բողոքել էին պարտադիր պահումների դեմ` պահանջելով իրենց ամբողջական աշխատավարձերը:

Մեր զրուցակիցը նշեց, որ միշտ էլ խնդիրներ եղել են` ցածր աշխատավարձի և այլ հարցերի հետ կապված, սակայն այս անգամ աշխատակիցները բողոքել են պարտադիր վճարների դեմ, և բողոքն ուղղված է եղել ոչ թե մետրոպոլիտենի ղեկավարության, այլ կառավարության ընդունած օրենքի դեմ: Նա նաև նշեց, որ ամուսինը ներկա պահին գնացել է իրավաբանների հետ հանդիպման, որպեսզի հասկանա, թե հետո ինչպես պետք է պաշտպանի իր  իրավունքները: Այսօր առավոտյան նրա ամուսնուն մետոպոլիտենի տնօրենները ներկայացրել են աշխատանքից հեռացման դիմումը, սակայն այդ երեք աշխատակիցները դեռևս չեն ստորագրել որևէ փաստաթուղթ: