ԱԱԾ-ն առաջարկում է Ադրբեջանին` սպասել դատավարությանը

Հայաստանի Ազգային անվտանգության ծառայությունը հաղորդագրություն է տարածել ԱԱԾ-ի կողմից` ի օգուտ Ադրբեջանի լրտեսության մեղադրանքով ձերբակալված  ՀՀ քաղաքացի Խաչիկ Եղիշի Մարտիրոսյանի վերաբերյալ:

«Ադրբեջանի Ազգային անվտանգության նախարարությունը զանգվածային լրատվամիջոցներում հերքել է Խ. Մարտիրոսյանի առնչությունը ադրբեջանական հատուկ ծառայություններին և նշել, որ նշված անձնավորությունն իրենց հայտի չէ: Ի տարբերություն Ադրբեջանի համապատասխան կառույցների, որոնք «բեմադրություն» կազմակերպելու համար ընդունակ են հոգեկան հիվանդությամբ տառապող ՀՀ քաղաքացի, սահմանմերձ գոտու բնակիչ, 77ամյա Մամիկոն Խոջոյանին ներկայացնել որպես «հայկական դիվերսանտ», ՀՀ Ազգային անվտանգության ծառայությունն իր գործունեությունը կառուցում է փաստերի հիման վրա, որոնք կոնկրետ Խ. Մարտիրոսյանի դեպքում կներկայացվեն դատավարության ժամանակ: Խուճապի մատնվելու ադրբեջանական կողմի շարժառիթները մեզ համար պարզ են, առաջարկում ենք սպասել դատավարության գործընթացին»,-ասված է հաղորդագրության մեջ: