Կառավարությունը չի փոխհատուցելու մաքսային ավելացումները

Մաքսային միության անդամակցության կապակցությամբ սպասվող գնաճի այն մեկնաբանությունները, որ տրվում են մամուլով, ոչ միտումնավոր, այլ բազմաթիվ խնդիրներով պայմանավորված, չեն համապատասխանում իրողությանը. Լրագրողներին այսօր ասաց ՀՀ էկոնոմիկայի նախարար Վահրամ Ավանեսյանը:

«Այն գնահատականները, որ մենք տալիս ենք, թե ապրանքների քանի տոկոսն են թանկանալու ՄՄ մտնելուց հետո, պետք է միշտ իմանանք, որ երբ տոկոսային հարաբերությամբ ասում ենք, որ 11 հազար ապրանքատեսակների 60 տոկոսը Մաքսային միությունում ավելի բարձր մաքսատուրք ունեն, քան ՀՀ-ում, 3 իմաստներով չի նշանակում, թե այդ 60 տոկոս ապրանքները թանկանալու են»,- նշեց նախարարը:

Այնուհետեւ նա պարզաբանեց, թե որոնք են այդ 3 իմաստները. Ըստ այդմ` առաջինը Վահրամ Ավանեսյանը նշեց, թե ապրանքներից ոչ բոլորն են, որոնց մաքսատուրքերը փոխվելու են` այն ապրանքները, որոնց ներկրումը ՀՀ կատարվում է այն երկրներից, որոնց հետ մենք ունենք ազատ առևտրի համաձայնագրեր, իսկ դրանք բոլորը ԱՊՀ երկրներն են` ներառյալ Վրաստանը, իսկ ՄՄ մտնելուց հետո կմիանան նաև այլ երկրներ, ինչպես Սերբիան է, որն ունի ազտա առևտրի համաձայնագիր ՄՄ-ի հետ, այս երկրներից ապրանքների ներկրման դեպքում մաքսատուրքերը որոնք 0 էին` կմնան 0: Եվ այդ 60 տոկոս ապրանքների մեջ, ասաց նախարարը,  մտնում են նաեւ այդ ապրանքները:

Երկրորդը` Վահրամ Ավանեսյանի մեկնաբանությամբ, երբ նշվում է 11 հազար ապրանքնատեսակի մասին, ապա պետք է իմանալ, որ ՀՀ-ում բոլոր 11 հազար դասակարգիչներով ապրանքներ չեն ներմուծվում` ապրանքախմբերի ընդամենը 10-12 տոկոսը կազմում են Հայաստան ներմուծվող ապրանքների 90-95 տոկոսը:

«Դրա համար այդ 60 տոկոսը ընդհանուր առմամբ է նշվում` շատ ապրանքատեսակներ կան, որոնցով մենք ունենք 0 ներմուծում, ու այդ 0-ն ինչքան էլ բարձր մաքսատուրքով բազմապատկես, արդյունքը կստացվի 0»,- ասաց Վահրամ Ավանեսյանը:

Նախարարի ներկայացրած երրորդ պատճառը վերաբերում է հանգամանքին, որ ՀՀ-ն պատրաստվում է ՄՄ ներկայացնել այն ապրանքների խումբը, որոնք մեր երկրի համար ունեն սոցիալ-տնտեսական կարևոր նշանակություն, եւ այդ ապրանքների համար մաքսատուրքերի ավելացման հարցում ստանալ բացառություններ: Խոսքը, ինչպես ասաց Վահրամ Ավանեսյանը, հիմնականում սննդամթերքի, դեղորայքին, նաեւ այն հումքային ապրանքների մասին է, որոնք ՀՀ տնտեսվարողների համար են կարեւոր:

«Այդ խումբը դեռ պատրաստ չէ, որոնցով մենք պատրաստվում ենք բանակցել` դեռ չենք սկսել այդ բանակցությունները: Բայց մենք պատրաստվում ենք դա անել ու սկսել բանակցությւոններ ՄՄ-ի հետ, որպեսզի Հայաստանն այդ ապրանքների գծով ունենա բացառություններ: Դա նշանակում է, որ նրանց մասով չեն ավելանալու մաքսատուրքերը, եթե մենք բանակցությունների ժամանակ հասնենք փոխադարձ համաձայնության»,- տեղեկացրեց նախարարը` հույս հայտնելով, թե տվյալ ապրանքների ցանկը վաղը պատրաստ կլինի եւ աշխատանքների ամբողջությամբ ավարտելուց հետո կուղարկվի ՄՄ, որպեսզի սկսվեն բանակցությունները:

Yerkir.am-ը հետաքրքրվեց, թե ինչ կլինի, երբ ակնկալվող բացառությունները Հայաստանը չստանա ՄՄ-ից, ու ինչ պետք է անի կառավարությունը նման սցենարների զարգացման դեպքում: Եթե որեւէ ապրանքի գծով այդ բացառությունները ստանալու համաձայնությունը չլինի, պատասխանեց Վահրամ Ավանեսյանը, ապա կառավարությունը, տվյալ դեպքերում, փոխհատուցումներ չի կիրառելու:

«Համենայն դեպս, եթե ինձ հարցնեն, ապա դրա պատասխանը միանշանակ ոչ է: Բայց մի բան պետք է նկատի ունենանք` ընդհանուր եթե նայում ենք ՄՄ մտնել-չմտնելուն` այս ապրանքների թանկացումների հետ կապված, ես միշտ ասել ու նորից ասում եմ`ՄՄ-ի մտնելու տնտեսական հաշվարկների տեսանկյունից, պետք է միշտ հաշվի առնել, թե չմտնելու դեպքում ինչ է լինելու: Մենք երբեւիցե չենք ասել, թե ՄՄ մտնելով պայմանավորված ապրանքների վրա մաքսատուրքեր ավելացնելը ճիշտ բան է ՀՀ-ի համար: Դա, ընդամենն, այո’, այն բացասական մասն է, որը մենք վերցնելու ենք` մտնելով ՄՄ: Բայց դա շատ ավելի ցածր բացասական էֆեկտ է, քան այն էֆեկտները, որը մենք կունենայինք, ՄՄ չմտնելով»,- ասաց Վահրամ Ավանեսյանը: