Ե՞րբ եւ ինչպե՞ս են փոխհատուցելու հրդեհից տուժածներին

Կորյունի 23 հասցեի այրված սեփական տների բնակիչներն այսօր ժամը 12:00-ին պետք է հանդիպեին երեւանի քաղաքապետ Գագիկ Բեգլարյանին, սակայն նրանց 15 րոպե ուշացումով ընդունել է փոխքաղաքապետ Կամո Արեյանը:

Հրդեհից տուժած Տիգրան Խուդոյանը մեզ պատմեց, որ երեկ Երեւանի Կենտրոն վարչական շրջանի ղեկավարն է այցելել իրենց եւ տեղեկացրել հաջորդ օրվա հանդիպման մասին:

Երեւանի քաղաքապետարանի տեղեկատվության եւ հասարակայնության հետ կապերի բաժնի պետ Անժելա Մարտիրոսյանն ասաց, որ փոխքաղաքապետը բնակիչներին հավատացրել է, որ յուրաքանչյուրի խնդրին լուծում է տրվելու հնարավորինս սեղմ ժամկետներում: Իսկ թե դա ե՞րբ եւ ինչպե՞ս կարվի, կոնկրետ ոչինչ չի ասվել:

Տիգրան Խուդոյանն ասաց, թե խոստացել են, որ վաղը կամ վաղը չէ մյուս օրը հանդիպում է լինելու նաեւ անձամբ Գագիկ Բեգլարյանի հետ:

Նշենք, որ, ամենայն հավանականությամբ, քաղաքապետարանում ընդունելությունը կլինի, բայց ավելի ուշ, եւ նրանց կընդունի արդեն նոր քաղաքապետը` Տարոն Մարգարյանը: